Russia-in phuba lak nan US palai 60 hnawtchhuak

UK-in an rama Russian spy hlui, Sergei Skripal leh a fanu Yulia-te tur hmanga beih a nihnaah Russia chu inhnamhnawiha puhin an rama Russia palaite a hnawtchhuak a, UK thutlukna siam hi thlawpna lantirin US chuan a rama Russia palaite a hnawtchhuak ve bawk a ni. US bakah EU ram dang eng emaw zatin Russia palai an hnawtchhuak bawk.

US-in a palaite a hnawh chhuah avanga phuba lak nan, Russia chuan an rama US palai 60-te a hnawtchhuak ve leh a ni. US palaite hnawhchhuah an nih thu a sawi rual hian Russia Foreign Minister Sergei Lavrov chuan Russia palaite hnawt chhuah an ni hi ram dangte pawhin a nghawng an tuar dawn tih a sawi tel. Russia hian UK-in an ram palai a hnawtchhuah zat ang chiah, an rama UK palai 23 te pawh alo hnawtchhuak tawh bawk a, hei bakah hian British Council pawh a khar tawh bawk a ni.

UK an thlawpna lantir hian ram 20 chuangin an rama Russia palaite an hnawtchhuak a, US chuan palai 60 a hnawhchhuah bakah, Seattle-a Russian consulate general pawh a khar tir nghal bawk a ni.

Russia minister chuan Britain chuan Russia dodal zawnga an chetna chu zawm turin ram dangte pawh a nawr vek niin a puh a, an ram chunga dik lo taka thiltih chu Russia chuan a chhang let dawn a ni, a ti. Sergei Skripal leh a fanu beihnaa Russia inhnamhnawih nia puhna chu thu dik lo a nih thu sawiin, thu dik tak hailan a nih theih nan Organisation for the Prohibition of Chemical Weapons (OPCW) hruaitute chu meeting neihpui a rawt bawk.

Britain chuan Skripal-te pafa beihna atana hman, nerve agent chu Soviet Union siam, Novichok tih a nih thu a sawi. A sample enchhin tur hian March 19 khan OPCW expert-te chuan UK hi an thleng tawh a, a result hi kar hnih hnuah tihchhuah theih beisei a ni.