Afghanistan President hluiin mipuite hnenah ngaihdam dil

Afghanistan president hlui, Taliban-ten Kabul khawpui an luh dawna ram danga tlanchhia, Ashraf Ghani chuan Nilaini khan Afghan mipuite hnenah ngaihdam a dil.

Ashraf Ghani chuan a twitter kaltangin ngaihdam dilna hi a tichhuak a, a kaihhruai sorkar a tlakchhiat mai avang chuan mipuite chu ngaidam turin a ngen a, hemi rual hian Kabul aṭanga a tlanchhuah ruala sorkar sum tam tak chhuahpui anga an sawina chu thudik lo a nih tih a sawi nghal bawk.

Ghani chuan rang taka Kabul a chhuahsanna chhan chu a security team-ten an nawr vang tih a sawi a, a awm lui zel a nih chuan kum 1990 chhoa Civil War laia tualchhung inbeihna rapthlak tak thleng ang kha a thlen nawn leh a hlauhawm tih an hrilh niin a sawi. "Kabul chhuahsan kha ka damchhunga thutlukna siam harsa ka la tih ber a ni. Mahse kha thil tualchhung indona thleng ven theihna, Kabul khawpui leh a chhunga cheng mi maktaduai rukte chhanhim theihna awmchhun niin ka ngai a ni," a ti.

Kabul a chhuahsan hnuah Ghani hi United Arab Emirates (UAE)-ah a tlanchhia a, tun thlengin a la awm a ni. A tlanchhiat nghal avang hian a thawhpui hrang hrangte sawisel pawh a tawk nasa hle a, phatsantuah an puh hial a ni.

China-in Afghanistan tan USD md 31 hu pe dawn
China chuan Afghanistan ṭanpuina turin USD maktaduai 31 hu pek a tiam. Chhawmdawlna pek a tum hi ei leh in lam bakah coronavirus vaccine-te a ni.

China thuneitute chuan Afghanistan-a Taliban sorkar nen inbiakna neih an inpeih thu an sawi bawk a, sorkar thar ding chu boruak a pangngai chho leh thuai theihna atan a ṭul a ni, a ti.

Nilainia Pakistan, Iran, Tajikistan, Uzbekistan leh Turkmenistan aiawhte nena meeting an neihah China foreign minister Wang Yi chuan Aghanistan tana chhawmdawlna an pek tur thu hi a puang a ni. Ram dangte pawh Afghanistan pui tura thawhpui turin a sawm nghal bawk.

Afghanistan aṭanga US sipaite lakchhuah an nih dan chungchang chu China hian a lo sawisel fo a, US sipaite chu Afghanistan rama buaina nasa tak thlengah a puh. US sipaite dah luh an nih tirh aṭanga lakchhuah a nih thlengin Afghan mipuite chhiatna thlenah an puh a ni.