NKorea-in zanlaiah military parade nei

North Korea chuan Nilaini zan zanlai hnu lamah khan an ram khawpui, Pyongyang-ah military parade pui tham tak a buatsaih.

NKorea hian a hma pawhin an ralthuam tharte pho chhuahna atan night-time military parade hi a lo nei ṭhin a ni. Kumin January thla pawh khan zanlaiah military prade hi an lo buatsaih tawh bawk a, hemi ṭum hian submarine-launched ballistic missile pholangin, hei hi khawvela ralthuam hlauhawm ber tiin an official-te chuan an sawi.

South Korea defence ministry chuan zanlai military parade neih a nih thu hi a sawi a, zan dar 1 hnu lamah halmawi hal leh jet fighter thlawk rite pawh hriat tur a awm tih a sawi. Nimin zing khan North Korea state media chuan night-time parade neih lai thlalakte tichhuakin, parade-naah hian sipaite chuan hazmat suit an ha a ni. An ram hotu lu ber, Kim Jong-un pawhin parade hi hmanpuiin,a thlalakte pawh pholan a ni bawk.

Nilaini zana parade-ah hian ṭum dang angin ralthuam tharlam pho chhuah a ni lo a, state news agency-in thlalak a tihchhuaha sipaite leh tractor thlalakte chauh a tilang a ni.

Nimin khan NKorea ram a din champha, National Day vawi 73-na a ni.