WHO-in kumin chhung booster dose pek khap rih turin ngen

World Health Organi­sation (WHO) chuan ram hrang hrang hnenah kumin chhung chu Covid vaccine extra dose, booster dose pek chhuah chu khap rih turin a ngen.

WHO chuan ram tam takah Covid vaccine dose khat la la lo, mi maktaduai tel an la awm tih sawiin, hetih laia ram ṭhenkhatin vaccine dose hnih mai ni lo, a booster dose thlenga an lo pe chhuak chu ngawi renga lo thlir an thei lo tih WHO hotu Tedros Adhanom Ghebreysus chuan a sawi.

Geneva-a WHO head­quarters-a thu a sawiah, Tedros chuan ram hausa zawk leh vaccine siamchhuaktute hnenah booster dose pek chhuah phawt aiin, ram rethei zawka health worker leh hriselna dinhmun derthawng zawkte tana vaccine dose khatna pek chhuah phawt chu ngai pawimawh turin a ngen. Mi tam tak vaccine dose khatna la thei lo an awm laia, hriselna ṭha leh vaccine dose kima la tawhte tana booster dose lo pek chhuah chu an duh lo tih a sawi a ni.

WHO hian thla hmasa khan vaccine semchhuah kawngah ram rethei leh hausa zawkte inkar zau lutuk tihziaawm a nih theihna atan September thla thleng chu booster dose hi pe tawh lo turin a lo ngen tawh. Mahse Tedros chuan ram hrang hrangte dinhmun thlirin booster dose pekchhuah khap hun pawh hi pawhsei a la ngai leh a ni, tiin Nilaini khan a sawi.

Ram hausaten ram rethei zawkte hnenah vaccine dose pek chhuah an tiam hi dose tluklehdingawn khat chuang ni mah se, heng zinga 15% aia tlem hi pekchhuah a la ni chauh tih Tedros chuan a sawi a, "Intiamkamna ringawt kan duh lo, a vaccine ngei kha kan duh zawk a ni," a ti.

WHO in a ngen fo chung hian ram ṭhenkhat chuan booster dose hi an pe chhuak chhunzawm tho a, dinhmun derthawn zawkte mai ni lo, mipui nawlpui tan pawh an pe mek a ni.