Joe Biden leh Xi Jinping inbia

US president Joe Biden leh China president Xi Jinping-te chu nimin zing khan telephone-in an inbia a, hei hi thla sarih dawn hnua ram hruaitu pahnihte inbiak lehna hmasa ber a ni.

White House-in a tarlan danin, President pahnihte hi minute 90 vel inbiain, US leh China inlaichinna ṭha zawk siam dan turte an sawidun.

Kumin January thlaa US President atana Joe Biden lakluh a nih hnuah, hruaitu pahnihte hi ṭum hnih an inbiakna a nei. Inbiak chhunzawm fo pawh an remti niin Chinese media-te chuan an tarlang.

US leh China inkar boruak hi sumdawnna, enthlatua inpuh leh hri leng chungchangah tunhnaiah a ṭha lo hle a ni. Kumin kumtir lama high-level talk an neih ṭum pawhin an in chhang na hle. Chinese official-te chuan China bei tura ram dangte fuihah US hi a puh a, hetih lai hian US chuan midangte hmuhah hmingṭhat lak tumah a puh let thung.

China-a Xijiang province-a Uighar hnamte suatah China hi a puh a, hei bakah hian Hong Kong-a security law a siam thar hmangin democracy rahbeh leh activist-te bitumah a puh bawk. China chuan a ram chhung inrelbawlnaah US hi inrawlh lo turin a ti thung a, khawvel mithmuhah rorellai Communist Party hming tihchhiat tumah a puh a ni.

US President hlui, Donald Trump hunlai aṭangin ram pahnihte hi insumdawn tawnna kawngah pawh an buai chho a, US hian China aṭanga bungrua lakluhah chhiahte siam belhin, hemi chhan letna atan hian China pawhin US thil siam a lakluhah chhiah lak a tisang ve nghal. Joe Biden hian Trump hunlaia insumdawnna kawnga China hrekna lo siam tawh chu a sut duh lo a, hei hian China pawh a tilawm lo hle.