Pakistan sipai aiawhten a rukin Myanmar tlawh
Pakistan sipai hnuaia high-level palaite chuan September 1-5 chhung khan a rukin Myamnar an tlawh.
Pakistan hian Myanmar sipai sorkar nena inzawmna ṭha siam turin a rukin hma a la nia sawi a ni. Palaite hian Myanmar defence force chu aircraft siamṭhat, enkawl leh Naval munition chungchangah thawhpuiah an sawm nia tarlan a ni.
Myanmar Airforce hian Pakistan rama remkhawm, China siam FF 17 jet an hmang a ni. TJF-17 hi Pakistan Aeronautical Complex leh China-a Chengdu Aerospace Corporation-ten an siam a ni.
Pakista-a Karachi-ah Myanmar police officer-te chuan chilpuah bomb sut dan training an nek mek niin report ṭhenkhat chuan an tarlang bawk.
UN General Assembly-ah ram aiawhtu nih inchuh dawn
Tun thla tawpa United Nations General Assembly neih turah sipai sorkar leh sipaiten an paihthlak tak, mipui thlan sorkar aiawhte an ram aiawhtu nih an inchuh dawn.
Sipai sorkar leh Parliament member paihthlak takten democracy sorkar aiawh tura an din thar, National Unity Goverment (NUG) chuan UN General assembly-a an ram aiawh tur hi a hranin an ruat ve ve a, mahse a khawi lam zawk hian nge an ram aiawh dawn tih erawh hriatchian a la ni lo.
UN-a Myanmar ram aiawhtu atan NUG chuan Kyaw Moe Tuna an thlawp a, ani hi February 1-a sipaiten sorkar thuneihna an hnehchhuh hma khan Myanmar UN ambassador a lo ni tawh a, sipai sorkar duh lohna lantira an rama nawrh huaihawt pawh a thlawp thu langsar takin a sawi a ni.
Hei vang hian sipai sorkar chuan thlakin, a aiah hian kum 26 mi Augn Thurein an ruat a ni.