Hmeichhiate minister an ni thei lo, fa hring zawk tur an ni - Taliban

Taliban thupuangtu Syed Zekrullah Hashimin-a'n Afghanistan-a sorkar thar an siama hmeichhia telh an ni loh chungchangah, hmeichiate chu minister an ni thei lo a, anni chu fa hring tur a ni tia a sawi chuan sawizui a hlawh hle.

Taliban-te hian Thawhlehni khan sorkar thara cabinet member turte puangin, mipa vek ruat an ni. Ministry pawimawh chang tura ruat zingah UN-in firfiaka a puante pawh an tel hlawm.

Sorkar huam zau zawk an siam dawn tiin lo sawi tawh mah se chanvo pawimawh chelh turin hmeichhiate ruat tel an ni lo a, hei vang hian Kabul khawpuiah pawh hmeichhe ṭhenkhat chuan lungawi lohna an lo lantir tawh a ni.

Hashimi chuan TOLO news-in a kawmnaah he thu hi sawiin, "Hmeichhiate chu minister an ni thei lo a, an phurh zawh loh tur kan pe tihna a ni. Hmeichhe tan cabinet-a tel ve a ṭul lo a, fa hring tur zawk an ni," tiin a sawi. Kabul-a nawrh huaihawtte pawh chu an rama hmeichhia zawng zawng aiawhtu an ni lo tih a sawi bawk.