Afghan hmeichhiate'n Taliban thlawpna lantir

Afghanistan khawpui, Kabul-ah Inrinni kha hmeichhe ṭhenkhat chuan sorkar thar siamtu, Taliban-te policy an thlawpna an lantir.

Kabul university lecture theatre ah hmeichhe 300 vel kalkhawmin Taliban flag te an vai a, thusawitute chuan khawthlang ramte an dem thu leh, Islamist policy chu an thlawp tlat tur thu an sawi. Kalkhawmte hian Taliban sorkar thar hnuaia dress policy angin an lu aṭangin an ke thleng an khuh vek a ni.

Taliban-te hian sorkar tharah hmeichhiate dikna chanvo chu Islam danin a huam chin hnuaiah humhalh sak an lo tiam tawh a, lehkha an zir pawh phalsak an ni ang tih an sawi a ni. Mahse education thuneitute chuan hmeichhia leh mipa section hrana dah emaw, hmeichhiate ṭhutna puana zar hliah emaw a nih chauhin hmeichhiate chu univeristy-a an zir phalsak a nih tur thu an sawi leh a ni.

Afghanistan-a sorkar thar hian phalna nei loa punkhawm a khap tawh a, Inrinnia hmeichhe pungkhawmte pawh hian phalna an dil tih education ministry-a director of foreign relations Daud Haqqani chuan a sawi.

University kawta pung­khawmte chuan tun hnaia Taliban sorkar duh lohna lantirtu, hmeichhe ṭhenkhatin Afghan hmeichhia zawng zawng aiawh ni anga an insawi chu an thlawp lo tih an sawi. Sorkar hmasa khan hmeichhiate chu dik lo takin a hmang zawk nia sawiin, an nalh leh mawina avang ringawtin hna thawk turtein a chhawr a ni, an ti. Taliban-ten hmeichhiate an lu khuh tura an ti chu an thlawp tih sawiin, "Hijab hmang duh lote hian min tina zawk a ni," an ti. Sorkar thar hnuaiah chuan hmeichhiate chu an him dawn a ni tiin, theihtawpa an thlawp zel tur thu an sawi.