Israel-in Palestinian tang tlanchhuak pali man leh

Israel police-te chuan kar liam ta Thawhṭannia Israel hmarlam, Gilboa tan-in aṭanga tlanchhuak, Palestinian mi paruk zinga pali chu an man leh tawh tih an sawi.

Venhimna khauh tak, Gilboa tan-in aṭang hian Palestinian mi parukte hi drainage system aṭanga lei verhin an tlanchhuak a, Israel police-te chuan man leh ngei tumin West Bank-ah beihpui an thlak zui nghal a ni.

Tang tlanchhuakte hi Israel beihnaa inhnam­hnawiha puha thiam loh chantirte niin, dam chhugn tang tura hremte an ni. Midang pahnih la bibote pawh man leh ngei tumin theihtawp an chhauh mek tih police-te chuan an sawi.

Israel prime minis­ter Naftali Bennet chuan police-te tang tlanchhuakte man an nih leh avangin police-te an fakawm hle tih a sawi a, an vaia man kim leh vek an nih hma chuan zawn zel an ni dawn tih an sawi. Tlanchhuak zinga la man lohte hi Islamic Jihad member Ayham Kamamji leh Munadel Infeiat-te an ni.

Hetih lai hian kar liam ta khan West Bank leh East Jerusalem-ah Palestinian-te chuan tang tlanchhuakte an thlawpna leh, Israel-in damchhung tang tura hremna a pek chu an dem thu an sawi. Misual ni loin, an zalenna sualtute an ni a, zalen taka nun ve an phu a ni, an ti.