NKorea-in long range cruise missile enchhin
North Korea chuan Japan ram kap thleng pha tur, long-range cruise missile thar a enchhin.
State official news agency, KCNA chuan nimin khan long-range cruise missile hi kar liam ta kartawp khan enchhin a nih thu a sawi a, missile hi km 1,500 thleng a thlawk tih an sawi. Ei leh in lam leh, economy lamah harsatna tawk mek mah se NKorea hian ralthuam siam hna hi a la thawk chhunzawm zel niin a lang.
US sipaite chuan NKorea thiltih hi khawvel tan pawhah hlauhthawnawn, a bikin Japan tan thil ngaihmawhawm tak a nih thu a sawi.
North Korean Rodong Sinmun chanchinbu chuan launch vehicle aṭanga missile kahchhuah lai leh, boruaka a thlawk lai thlalakte an tichhuak.
KNCA chuan Inrinni leh Pathianni khan test hi neih a nih thu sawiin, missile-te hi an target fuhin an ram chhung tuipuiah an tla tih a sawi. Hei hi NKorea-in nuclear ralthuam phur thei, long-range missile a enchhin hmasak ber nia sawi a ni.
UN Security Council chuan NKorea hi ballistic missile a enchhin a khap a, mahse khapsak zingah hian cruise missile erawh a tel lo thung. Council chuan ballistic missile hian ralthuam tam leh chak zawk a phurh theih bakah, a kah chin a thui theih zawk leh a thlawh chak zawk avangin cruise missile aiin a hlauhawm zawkah a ngai.
Japan cabinet secretary Katsunobu Kato chuan NKorea thiltih chu an ngaimawh hle tih sawiin, US leh SKorea nen thil awmdan chu an enfiah mek thu a sawi.
Ram pathum official-te hi tunkar chhung hian NKorea chungchang sawiho turin an inhmukhawm dawn a ni.