UN in Gaza-a chengte hnenah ṭanpuina sum sem

United Nations chuan nimin aṭang khan Qatar hnen aṭanga an pawisa dawn hmangin Gaza Strip-a cheng, Palestinian chhungkaw harsate tan ṭanpuina sum an semchhuak tih UN Middle East envoy Tor Wennesland chuan an sawi.

Qatar hian kum 2014-a Israel ten Gaza Strip an beih hnu aṭang khan ṭanpuina tur dollar maktaduai tam tak an thawh ṭhin a ni. Mahse May thlaa Hamas leh Israel-te an inbeih hnu khan, Qatar-in ṭanpuina sum a pek ṭhin hi Hamas-te kuta a lut loh tura an pek dan kalphung ennawn chu Israel leh US chuan an phut a, hei vang hian ṭanpuina sum pek ṭhin pawh hi hren sak rih a ni ta a ni.

UN leh Qatar-in funding scheme an siamṭhat chu Israel pawhin a thlawp a, hemi avang hian ṭanpuina sum pawh hi pekchhuah leh ṭan a ni thei ta a ni. UN official chuan Gaza Strip-a distribution point 700 chuangah sum hi sem a nih thu a sawi. Mi nuai khat dawnin he ṭanpuina sum hi an dawng tih UN palai chuan a sawi. Official-te chuan distribution point-te endik an nihdan leh, Hamas-te kaltlang loa pek chhuah a nih dan erawh an sawichiang duh lo thung.

Qatar hian Hamas rorelna hnuaia hnathawkte chhawmdawlna, khawthlang ramten an thlawp, Palestinian Authority (PA) enpuina hnuaia pekna turin bank-te pawh inremna an lo siampui tawh bawk. Mahse PA hi he inremna siam aṭang hian kar liam ta Zirtawpni khan a inhnukdawk a, he thila an inhnamhnawih zel chuan dan leh a kaihhnawih lamah harsatna an tawh chhoh an hlau a ni. Hamas hi khawthlang ram eng emaw zat chuan firfiak pawlah an puang a ni.

Qatar-in Gaza-a miretheite ṭanpuina tura an hmalakna hi Israel chuan an thlawp thu sawiin, prime minister Naftali Bennett pawhin heng sumte hi Hamas-te kutah lut loin, a dawngtu tur dik takte kut a thlen zel theihna turin hma an la zel dawn tih a sawi. Hemi rual hian ṭanpuina pek hi a sum fai ang ni lo, a voucher zawka pek a nih thu a sawi bawk.