Damloh vangin court-ah Suu Kyi-i a inlan thei lo

Myanmar ram hruaitu paihthlak tak, Aung San Suu Kyi chu nimin khan a thubuai neih mekte court-a ngaihtuah hun a ni a, mahse a dam ṭhat loh avangin court-ah hian a inlan thei lo tih a legal team-te chuan an sawi.

Kum 76 mi, Suu Kyi hi kumin February 1-a sipaiten civil sorkar thuneihna an hnehchhuh hnu khan pawn chhuak thei loin an hreng a, thubuai pawh eng emaw zat an siamsak zui ani.

A lawyer, Min Min Soe chuan Suu Kyi-i a lu a hai a, a taksa pawh a chak tawk loh avangin court-ah hian a inlan thei lo tih a sawi a, Covid-19 a kai lo tih a sawi nghal bawk. "Ngaihtuahawm a ni lo a, thui tak motor a chuang khat tawh a, a motor rui nen a chak tawk lo a, chawlh hahdam a duh a ni," a ti.

Sipaiten pawn chhuak thei loa an hren avang khan Suu Kyi hi pawn lam mite nen inbepawp thei loin a awm zui a, a legal team-te chauh hi a biak theih chhun a ni. Hei pawh hi sipaite hian biak theih chin turah khuahkhirhna an siam nia sawi a ni bawk.

Myanmar khawpui, Naypyitaw court-a thubuai siamsak zingah hian phalna nei loa ram dang aṭanga walkie-talkie radio lalut leh kawlah puh a ni a, coronavirus protocol bawhchhiaah puh a ni. Hei bakah hian thamna tam tham tak la leh Official Secrets Act palzut-ahte puh niin, heng thubuaiah hian thiam loh chantir a nih chuan kum 14 thleng jail tantir theih a ni ang. Mahse a lawyer-te chuan an puhnate hi thu dik lo vek a nih thu an sawi.