Israel-Gaza ramri-a buaina chhuakah mi 16 thi

Israel-in Palestinian ram a awp, Gaza Strip leh Israel ramri bulah kar kalta Zirtawpni khan Palestinian mite leh Israel sipaite inkarah buaina a chhuak a, Palestinian mi 16 an thi a, mi 1,400 velin hliam an tuar.

Palestinian mite hian Gaza ramri bulah hian puan-in kaiha lungawi lohna lantir an tum a. Israel sipaite chuan ramri hnaih lo tura an hriattir hnuah, Palestnian mite hian Zirtawpni khan ramri pan hian kawng an zawh a, ramri hungna bangte tihchhiat an tum a ni. Israel police-te chu lunga an tawng bakah motor ke te an hal zui bawk.

Israel police-te chuan lo dangin, a ṭul tawpah chauh silai an hmetpuak niin an sawi a, ramri hungna bang tihchhiat tuma kal luite chauh an kap niin an sawi. Hetih lai hian Palestinian lam chuan Israel chu sipai chakna hmanga mipuite beiah a puh thung a, sipaite chuan an tana hlauhawm ni lo te pawh an kap niin an sawi.

UN Secretary General Antonio Guterres chuan Gaza ramri-a thil thleng chu lang tlang taka chhui a phut a, European Union diplomat hotu Fedreica Mogherini pawhin Israel sipaite silai mu tak an hmanna chhan chu chhui a phut bawk.

Palestinian President Mahmud Abbas chuan Inrinni kha Israel sipaite kuta thite sunna ni atan a puang a, heng mite thihnaah hian Israel chu mawhphurtu a nih thu a sawi.

Hetih lai hian Israel Prime Minister Benjamin Netanyahu chuan ramri vengtu an sipaite chu a fak ve thung a, Israel chu a ram tihchhiat tum a, mipuite himna tiderthawngtute chungah na takin a che zel dawn a ni, a ti.

Inrinni tlai lam khan Israel-Gaza ramri bulah hian buaina a chhuak thar leh bawk. Gaza Health Ministry thupuangtu Ashraf al-Qedra chuan Israel sipaite silai hmehpuahah Palestinian mi 35 in hliam an tawrh belh leh a, heng mite hi damdawi-inah hruai nghal an nih thu a sawi. Hliam tuar zinga a tam zawk hi silai muin a fuhte niin a sawi bawk.