Israel PM-in Egypt a tlawh

Israeli prime minister Naftali Bennett chu Thawhṭanni khan Egypt-ah a zin a, Egypt president Abdel Fattah al-Sisi nen inkawmin Israel-Palestinian chungchang bakah ram pahnihte inzawmnate an sawidun. Bennett hi kum 10 hnua Israel sorkar lu zinga official thila Egypt tlawh leh hmasa ber a ni.

Far-right party hotu Bennett-a kaihhruai sorkar hi kumin June thla khan lakluh a ni. Thla hmasa khan Sisi hi zin turin an lo sawm tawh a ni. May thlaa Gaza Strip-a Israel leh Hamas-te ni 11 an inbeih hnuah inkahhai puanga inremna an siamna kawngah khan Egypt hi a hma latu ber a ni.

PM Bennett chuan Sharm el-Sheikh-a Red Sea resort-a an inbiaknaah, venhimna leh eibar zawnna kalpui dan tur an sawidun tih sawiin, "Hma lam pan zel turin inzawmna thuk tak kan siam a ni," a ti.

Inbiaknaah hian, Sisi chuan Palestinian ram huamchhunga remna leh muanna a awm theih nan , boruak ṭha a awm theihna tura ram dangte puihna a pawimawh thute pawh a sawi tih Egypt lam thuchhuah chuan a tarlang. Sisi chuan Middle East-a remna a awm a, two-state solution chu siam a nih theihna turin Egypt chuan a theih angin a pui zel dawn tih a sawi bawk.

Israel leh Palestinian-te hian inremna zawnga inbiakna an neih chu kum 2014 khan an lo titawp tawh a, inbiak thar thawh leh tumna hi an nei lo ve ve rih nia sawi a ni. Israel PM thar, Bennett hi Palestinian ram hran pek dodaltu a ni a, hei vang hian a kaihhruai sorkar pawhin Palestinian ram an luah chin economy dinhmun siamṭhatna tur policy siamte chu a thlurbing zawk a ni.

Egypt hian kum 1979 khan Israel nena thawhdunna tur inremna ziakin, Arab ram zinga Israel nena peace treaty ziak hmasa ber an ni. Mahse an thawhdunna kawngah security lamah khuahkhirhna te an siam a, economy lama an inzawmna pawh bithliah chin an siam bawk.

Hripui leng vanga hun eng emaw chen khuahkhirhna an lo siam tawh, Israel leh Sinai inkara Taba crossing pawh Thawhṭanni aṭang khan hawn a ni leh tawh. October thla aṭangin Egyptair pawh Cairo leh Tel Aviv inkarah thlawh tir a ni bawk ang.

Israeli prime minister-in official-a Egypt a tlawh hnuhnun ber chu kum 2011-a Benjamin Netanyahu-a'n Egyptian President hlui Hosni Mubarak nen Sharm el-Sheikh-a inbiakna an neih ṭum kha a ni.