Taliban-te'n Vice President hlui in aṭangin USD mtd 6 leh gold brick 15 an man

Taliban fighter-te chuan Panjshir province-a Afghanistan Vice-President hlui Amrullah Saleh-a chenna in aṭangin USD maktaduai ruk leh gold brick 15 an man tih an sawi.

Hemi chungchangah hian Saleh leh a ṭhuihruaite erawh chuan thuchhuah engmah an la nei lo thung. Panjshir province hi Taliban-ten an lak hnuhnung ber niin, Saleh leh a ṭhuihruaite hian Taliban-te hi theihtawpin an lo do let a ni. Kar liam ta Inrinni khan Taliban-te hian Saleh-a unaupa, Shursh Saleh leh a driver atana a hman, a pu Rohullah Azoizi chu an lo kaphlum tawh bawk a ni.

Tajikistan-a Afghanistan ambassador, Mohammad Zahir Agbar chuan Taliban-ten Kabul khawpui an luh hnuah an ram aṭanga tlanchhia, President Ashraf Ghani khan USD maktaduai 169 a tlanchhuahpui niin a sawi bawk. Agbar chuan Ghani chu man a, Afghanistan sum a tlanchhuahpui chu laksak a ni leh ngei tur a ni, a ti.

Taliban hruaitu Baradar-a'n audio message tichhuak

Taliban senior leader leh deputy prime minister atana ruat thar, Mullah Abdul Ghani Baradar chuan a thi nia thuthang awm chu thudik lo a ni tih sawiin audio message a tichhuak.

Taliban thupuangtu, Maohmamd Naeem chuan nimin khan Baradar-a audio message hi tichhuakin, presidential palace-a Taliban pawlho intihbuainaah Baradar kahhlum nia social media lam thu thehdarh chu a dik lo tih a sawi.

Baradar chuan, "Media lamah ka thi niin thu dik lo thehdarh a ni. Taliban pawl inkarah buaina a chhuak nia sawi a ni bawk. Mahse hengte hi thu dik lo vek a ni a, harsatna leh buaina engmah kan nei lo," tiin a sawi a ni.