Kum 2020: Environmentalist activist an thah hnem ber kum

Nikum, kum 2020 khan environement humhimna kawnga thawktu leh land rights lam buaipuitu thah an tam hle a, chhinchhiah theih chinah environmentalist activist an thah hnem ber kum a nih thu Global Witness report chuan a tarlang.

Global Witness-in a tarlan dan chuan nikum chhung khan environmentalist activist 227 lai chu thah an ni a, hetiang zata tam hi record a la ni ngai lo. Kum 2019 khan environmentalist activist thah tam ber kum a lo ni tawh a, mahse nikumah hian an tam zawk a ni.

Activist thah zinga hmun thuma ṭhena hmun khat vel lai chu resource exploitation lam hawi- logging, mining, large-scale agribusiness leh hydroelectric dam lam nena inzawmna nei an niin an tarlang.

Report chuan nunna chantate chu 'environment humhimtute' tiin an ziak hial a, ramhnuai, tui supply leh tuipui bakah leilung hausakna chi hrang hrang humhimna avanga nunna chan an nih avangin hetiang hian an tarlang a ni.

Global Witness chuan kum 2015-a climate change chungchanga Paris Agreement ziah a nih hnuah khan kartinin activist pali tal thah ziah ang a nih thu an sawi.

Brazil, Nicaragua, Peru leh Philippines ramahte chuan thing tawlhruk kaihhnawihah activist 23 lai thah an ni. Colombia chu activist thah leh beih nasatna ber niin nikum chhung ringawt khan activst 65 lai an thi.

Colombia dawtah chuan Mexico chu thi an tam berna ram a ni a, environment venghimtu 30 lai nikum khan thah an ni. Phillipines chu thi tamna ram pathumna niin 29 an thi a, Brazil-ah 20 lai an thi ve bawk.

Global Witness tana senior campaigner Chris Madden chuan ram hrang hrang sorkarte chu hemi chungchang hi la thutak turin a chah hial a, company hrang hrangte chuan mihring nunna leh kan khawvel chu hlawkna aia dah pawimawh hmasa turin a chah a ni.

North America, Europe leh Oceania-te chu activist-te'n beih an tawh nasatna ber hmun an ni a, heng continent pawn lamah hi chuan thi pakhat chiah record a ni thung.