Kum 1980 aiin khawlum lamin 50C a thlen chin a letin tam tawh

Khawvel boruak lum chho zelah, kum 1980 aṭang khan khawlum lamin 50C (122F) a thlen ni chu a pung chho zel.

Kum 1980 leh 2009 inkar khan temparture-in 50C a thlen ni hi ni 14 a awm a, mahse kum 2010-2019 inkarah chuan hetianga khawlum lai hi ni 26 a awm tawh thung.

University of Oxford-a Environ-mental Change Institute associate director, Friedrikie Otto chuan khaw lum zual ni pung chho zel hi fossil fuel hal vang a ni tih a sawi. Khawvel pum boruak a lum belh zel avangin heng aia khawlum zual ni pawh hi a la thlen chhoh ngei a rinawm. Boruak sa lutuk hi mihring leh nungcha dangte tan pawh a hlauhawm thei a, building, kawngpui leh power sytstem thlengin a nghawng pawi thei a ni.

Khaw lum lamin 50C a thlenna hi Middle East leh Gulf region-ah a ni tlangpui.

Kumin nipui lai khan Italy-ah 48.8C leh Canada-ah 49.6C te thleng chhoin, an rama khaw lum ni ber an thleng ve ve. Scientist-te chuan fossil fuel tihchhuah chu tihtlem a nih thuai loh chuan 50C hi ram hrang hrangah a thleng chho ve thuai thei tih an sawi. University of Oxford-a School of Georgraphy and Environment-a climate researcher Dr Sihan Li chuan, "Rang taka hma kan lak a ngai tawh a ni. Emission hi kan tihtlem chak chuan kan vaia tana ṭhatna tur a ni mai dawn a ni," a ti. Hma lak a nih thuai loh chuan, boruak lum leh sa lutuk hi a zual zel dawn a, a thleng ngun dawn bawk a, a siamṭhat pawh a hautak chho zel dawn tih a sawi.

BBC pawhin hemi chungchang a zirchiannaah, kum 1980-2009 inkar aiin kum 10 liam ta chhunga khaw lum lam hi 0.5C in a sang tawh a ni. Mahse hetianga khaw lum belhna hi ram hrang hrangah a inang lo thung. Europe khawchhak lam, Africa chhim lam leh Brazil-ah chuan temperature sanna hi 1C vel a tling a, Artic leh Middle East-ah chuan 2C chunglamte a tling pha thung.

Khaw lum lam tehna in 50C a tlin hian mihring hriselna kawngah nghawng ṭha lo tak a thlen thei. Tun anga khua hi a lum chhoh zel chuan kum 2100-ah chaun mi tluklehdingawn 1.2 vel chuan khaw lum vanga taksa lama harsatna, heat stress an nei thei dawn niin US-a Rugters University zirchianna neih chuan a tarlang. Boruak lum lutuk vang hian ram kang pawh a thleng tam zual thei dawn a, khaw kheng avangin mi tam tak eizawnna thlengin a nghawng buai thei dawn a ni.