Ṭhalai zingah Climate Change vei an tam

UK-a Bath Univeristy-in univeristy dang panga nena zirchianna an neihah, ṭhalai zingah Climate Change chungchang vei leh, hlauhthawn phah an tam hle.

Zirchianna hi ram 10 - UK, Finland, France, US, Australia, Portugal, Brazil, India, Philippines leh Nigeria-ah neih a ni a, campaign leh research group Avaaz-in an senso hi a tumsak a ni. Kum 16-25 inkar mi 10,000 te chu Climate Change chungchangah zawhna zawh an ni a, hetiang lama zirchianna an neih zau ber a la ni.

Zawhna chhangtu zinga 60% dawn chuan sik leh sa inthlak danglam chak avang chuan hmalam hun tur a hlauhthawnawm hle niin an sawi a, 45% chuang chu an nitin khawsak phung thlengin a nghawng tawh nia an ngaih thu an sawi. 56% chuan mihringte dinhmun chu a chhe tawh hle tih sawiin, zawhna chhangtu zinga hmun thuma ṭhena hmun hnih chuan an hlauhthawn leh chiai phah hle thu an sawi bawk. Tam tak chuan an thinrim thu leh, hetianga thil thlentir a nih hi zahthlak thute an sawi a, beiseina erawh an la neih thu an sawi bawk.

Ṭhalai tam zawk hian sik leh sa inthlak danglam chak lutuk tur venna kawngah sorkarte chu an hlawhchham nia an ngaih thu sawiin, politician leh puitling zawkte chuan ṭhalaite hmakhua ngai loin an hlamchhiah nia an ngaih thu an sawi bawk. Sorkar hrang hrangten hma an la mai lo chu mak an tih thu te, leilung tihchhiat chuan ṭhalai tam tak hmalan hun tur nasa tak a nghawng thu an sawi.

Zirchianna an neiha an hotu, Caroline Hickman chuan sorkarten hma an lak ṭhat tawk loh avangin ṭhalaite chuan ngaihthah leh phatsana a inngaih thu a sawi a, zawhna chhangtu zinga 10-a pali-te chuan fa neih pawh an hreh thu an sawi a ni, a ti. Ṭhalai tam tak chuan climate change chungchanga media lama an chhiar chauh ni lo, an mit ngeiin a nghawngte an hmu chho zel a, hei hian anmahnia hlauhthawnna nasa tak a siam phah a ni, a ti. Zawhna chhangtu zinga pakhat chuan, "Thih mai chu ka la duh lo. Mahse naupang leh ramsate ngaihsak hlawh tawh lohna khawvela chen zel reng hi chu ka chak chuang lo a ni," a ti.

Climate Change chungchanga ṭhalai zinga hlauhthawnna nei chu climate policy neih ṭha lo ramah an tam zel tih sawiin, ramngaw kang thlen tamna Portugal ṭhalai zingah hlauthawnna nei an tam zual tih a sawi. He zirchianna report hi journal Lancet Planetary Health-ah tihchhuah a ni ang.

Ṭhalaite zawhna an zawh ṭhenkhat an chhan dan
1) Mipuite hian khawvel hi kan ngaihsakin kan enkawl ṭha tawk tawh lo - 83%
2) Hmalam hun hi a hlauthawnawm tawh hle - 75%
3) Sorkarte hian ṭhalaite an tibeidawng tawh - 65%
4) Sorkarte hi rinngam an la ni - 31%