Palestinian mite beihna thleng dem

Egypt leh Jordan foreign minister-te chuan kar kalta-a Palestinian mi nawrh huaihawtte chunga Israel sipaite chet dan chu an dem thu sawiin, Palestinian mite dikna chanvo venhim sak tura mawhphurhna chu khawvelin a lak a ngai a ni, a ti.

Jordan Foreign Minister Ayman Safadi nena joint press conference an neihnaah, Egypt foreign Minister Samesh Shoukry chuan Palestinian mipuite venghim tura khawvel ram hrang hrangte an thawhchhuah a ngai tiin, inremna a awm theihna tura nawr a ngai a ni, a ti.

Kar kalta Zirtawpni-a Gaza Strip leh Israel inri-na kawngzawhah Palestinian mite leh ramri vengtu Israel sipaite chu intibuaiin, Israel sipaiten silai an hmehpuahah Palestinian mi 16 an thi a, mi 1,400 chuangin hliam an tuar bawk. Kawngzawhte hian khawthlang ramte puihnaa kum 1948-a Israel din a niha Palestinian mi tlanchhia leh umchhuahte chu an khuaa an kir leh theihna tura a dikna chanvo pek an phut a ni.

United Nations Secretary General Antonio Guterres chuan Israel-Gaza ramri-a buaina chhuak chungchang hi langtlang taka chhui chiang tura a duh thu a sawi tawh a, he buaina thlenga inhnamhnawihte chu boruak tichhe zawnga thil ti tawh lo turin a ngen bawk. UN Security Council chuan he buaina thleng vang hian emergency meeting pawh a nei nghal bawk a ni.

Hetih lai hian Israel chuan ramri-a tharum thawhna thleng chungchangah Gaza Strip-a roreltu, Palestinian firfiak pawl Hamas an dem thu a sawi thung. Hamas-te chuan civil mite chu hmathehah hmangin, ramri hungna tichhe turin an tir niin a puh a, Palestinian-te chuan Israel chungchang dik lo taka thehdarh a nih theih nana UN hman ṭangkai tumin tenawm takin an che niin an sawi.