Donald Trump-an DACA dealtihtawp a nih thu a sawi

US President Donald Trump chuan naupan laia document mumal nei loa US-a lut, Dreamer-te hnena hamṭhatna pek ṭhin, DACA (Deferred Action for Childhood Arrivals) deal chu tihtawp a nih thu Pathianni khan a sawi.

DACA program hi kum 2012, Barack Obama president hun laia siam a ni. He program hnuaiah hian document mumal nei loa an nu leh paten US-an an pempuite hnena hnathawh phalna pek an ni a, an rama thawn haw tur laka hum an ni bawk. He program hi tihtawp a nih tur thu Donald Trump chuan a lo sawi tawh a, Pathianni khan a twitter-ah US-Mexico ramri chu a hlauhawm zual zel tih sawiin, Dreamer-te tana US-a awm leh hnathawh phalsakna pek ṭhin siam zui a ni dawn lo tih a sawi a ni. US Customs and Border Protection data-a a lan danin, US President-a Trump lakluh a nih hnu hun eng emaw chen chu US-Mexico ramri kaltlanga dan loa US lut man zat hi an tlahniam hle. Mahse kumin kumtir lam aṭangin dan loa ramri paltlang hi an pung chho leh hle tawh a ni.

Trump chuan a twitter-ah an ram chhim lam aṭanga dan loa ramri paltlang ṭhinte veng tur hian Mexico chuan hma a la lo niin a sawi a, ramri paltlanga lutte leh ruihhlo tawlhruk ṭhin chu titawp turin hma an lak a ngai a ni, a ti. Mexico chuan ramri venhimna kawngah a puih a ngai a ni tih sawiin, mi tam tak chuan DACA program chu hman ṭangkai tumin dan loin an ram an lut niin a sawi