Puigdemont-an independence sual chhunzawm turin fuih

Spain aṭanga inlakhran duh, Catalonia bial hruaitu hlui Carles Puigdemont chuan Spain aṭanga Catalonia bial independence suala an beihna chu chhunzawm zel turin amah thlawptute a chah.

Carles Puigdemont-a hi Catalonia bialin independence a duh leh duh loh chungchanga regional sorkarin mipuite vote lakna a buatsaih kaihnawihah Spain sorkar chuan hel leh ram phatsantua puhin manna tur thupek a tichhuak a ni. Belgium rama a tlanchhiat hnuah Finland a tlawh chu ramri bulah Germany police-ten an man a, German police-te kutah a la awm mek a ni. Spain chuan Puigdemont hi an rama thawn kir turin a ngen a, hei hi German judge-te chuan ni 60 chhungin an ngaihtuah ang. Spain-ah hian hruai haw a nih a, thiam loh chantir a nih chuan kum 30 thleng lung-in tantir theih a ni ang.

Hetih lai hian Puigdemont-a chhuah phut hian Pathianni khan Berlin-ah Catalonia independence thlawptute chuan kawng an zawh a, kawng zawhnaah hian Puigdemont-a thusawi record hi tichhuah a ni. A thusawi hi German MP, Diether Dehm-an a tanna hmuna a tlawh ṭuma a record a ni. Man a nih hnuah Puigdemont-a thusawi tihchhuah hmasa ber a ni bawk.