Muttaqi-a'n Taliban sorkar thawhpui turin ram dangte a sawm

Afghanistan-a Taliban sorkara foreign minister, Amir Khan Muttaqi chuan sorkar thar a din hnua media mite a kawmna hmasa berah Taliban sorkar chu thawhpui turin ram hrang hrangte a sawm.

Muttaqi hian Kabul-a media mite a kawmnaah US chu Taliban sorkar thar laka a dem thu sawiin, thuneihna an chan hnuah ṭanpuina an dawng ṭha tawk lo tih a sawi. "US chu an mi leh sate an lakchhuah hnuhnung ber thlengin kan pui zel a, mahse kan laka lawmthu sawi ahnekin kan thil neihte khawih chet theih loin min hren zui sak ta zawk a ni," a ti.

August 15-a Taliban-ten Afghanistan khawpui, Kabul an lak a, president Ashraf Ghani ram dangah a tlanchhiat hnu aṭang khan US Federal Reserve, International Monetary Fund leh World Bank-te chuan Afghanistan-in a sum dawn tur angte chu an hrek sak nghal a, hei vang hian sum leh pai lamah harsatna lian tak an tawk chho nghal a ni.

Hetih lai hian Thawhṭannia UN donor conference-ah Afghanistan ram chhawmdawlna tur hian USD tluklehdingawn khat chuang pek an tiam. Muttaqi chuan he meeting-a Afghanistan tana emergency aid pek an tiam chu lawmawm an tih thu a sawi nghal bawk.

Muttaqi chuan sorkar thar chu eng ram pawh thawhpui thei turin a inhawng reng tih sawiin, US pawh thawhpui an inhuam vek tih a sawi. Hemi rual hian eng ram thuhnuaiah mah an kun dawn lo tih a sawi nghal bawk.

Thawhlehni khan Muttaqi hian Kabul-ah Chinese ambassador Wang Yu nen an inkawm a, hemi hma hian UN Nations High Commissioner for Refugees, Filippo Grandi kaihhruai palaite nen an inkawm tawh bawk a ni. Muttaqi leh Wang hian Taliban sorkar thar leh ram pahnihte inlaichinna leh thawhdunna chhunzawm zel dan turte an sawidun a ni. China hian tun hnaiah Afghanistan tan emergency aid, USD maktaduai 31 a pek tur thu a lo puang tawh a ni.

Filippo Grandi nena an inkawmnaah hian ram pawn lama Afghan raltlante bakah, ramchhung hmun hrang hranga himna zawnga tlanchhiate chungchang an sawidun a, chhawmdawlna pek dan turte pawh an sawi nghal bawk. Muttaqi chuan Grandi hnenah hian Taliban sorkar chuan Afghan raltlante chu rawn kir leh se an duh thu sawiin, an kir leh theihna turin ram hrang hrang thawhpui pawh an inpeih reng tih a hrilh.

Taliban kaihhruai sorkar thar hi eng ram mahin an la pawmsak lo a, hei hian kum 20 chhung ram dang puihnaa nasa taka innghat, Afghanistan economy thlengin a nghawng thui hle dawn a ni. World Bank-in a tarlan danin, ram dang aṭanga ṭanpuina rawn lut chu Afghanistan gross domestic product aṭanga 40% a tling pha a ni.

UN chief Antonio Guterres chuan donor conference-ah Taliban-te hi thawhpui an nih loh chuan Afghanistan mipuite chhawmdawlna pek chu thil theih a ni dawn lo tih a sawi a, hei vang hian tunah chuan thil awmdan hrang hrangte ngaihtuahin Taliban-te chu thawhpui phawt an ngai a ni, a ti.

European Union-a foreign policy chief Josep Borrell chuan EU chuan Taliban te inbiakna neihpui phawt mai loh chu thlan tur dang an nei lo tih a sawi.

Mattaqi chuan tualchhung indona chu a tawp tawh a, hei vang hian Taliban kaihhruai sorkar chu inzawmna ṭha neihpui turin ram dangte a ngen. 'Ram pumah venhimna pawh ṭha takin kalpui a ni," tiin foreign investment tih duhte tan an inhawng reng tih a sawi. Taliban sorkar chuan Afghanistan ram leilung chu helten ram dang an beihna hmun atan an hman a phal dawn lo a ni, a ti bawk.

Afghan mite chu document felfai tak an neih chuan Afghanistan chhuahsan a, ram danga an kal phalsak an ni reng tih Muttaqi chuan a sawi bawk. Hetih lai hian acitivist-te chuan Taliban-te chu Afghan mi, document fel tak neite pawh an kalchhuah an phalsak lo niin an sawi thung.