Israel jail-a Palestian tang 1,400 ten nawrh huaihawt

Israel jail hrang hranga tang, Palestinian mi 1,400 vel chuan hren an nih dana lungawi loin chaw ngheiin nawrh an huaihawt tih Palestinian Authority chuan a sawi.

September 6-a Israel hmarlam jail aṭanga Palestinian mi parukte lei an verh aṭanga an tlanchhuah hnuah jail dang boruak pawh a ṭha lo chho nia sawi a ni. Tang tlanchhuak zinga pali hi man an ni leh tawh. Hetih lai hian he jail-a tang Palestinain mi tam tak chu hmun dangah sawn niin, an thil neihte pawh an laksak niin Palestinian Prisoners' Club chuan a tarlang. Hei vang hian jail hrang hranga Palestinian awm mekte chu an lungawi lo hle a ni.

Palestinian Authority-a commissioner for prisoner hotu Qadri Abu Bakr chuan Israel rama tanin hrang hrangah Palestinian mi 4,000 chuang an tan mek thu leh, an zinga 1,380-te chuan kar liam ta Zirtawpni aṭang khan chaw ngheia nawrh an huaihawt thu a sawi.

Tangten nawrh an huaihawt hnuah an aiawhte leh Israel prison hotute chu inbe tawh mah se, hmasawnna engmah a la awm lothu a sawi bawk.