UK Parliament-a hun hmanah China ambassador tel phal lo

United Kingdom (UK)-a China ambassador, Zheung Zeguang chu UK Parliament-a hun hmanah a tel khapsak a ni.

Zhueng Zequang hi nimin khan Parliament-a All Party Parliamentary China Group (APPG)-in hun an buatsaihah thu sawi tur a ni a, mahse Thawhlehni khan thusawi hi khapsak a nih bakah, Parliament-ah pawh kal lo tura tih a ni.

UK Parliament member ṭhenkhat chuan Xijiang province, China-a mihring dikna chanvo nasa taka palzut a nih chungchang an sawisel avangin China chuan a hrek a ni. Hei vang hian House of Commons speaker Lindsay Hoyle leh House of Lords speaker John McFall-te chuan Zheng-a'n Parliament-a hun an hmang tur hi an lo dang ve nghal ani.

House of Lords speaker thupuangtu chuan hemi chungchang hi sawifiahin, "House pahnihah speaker-te chuan member ṭhenkhatte China-in a hrek mek avangin APPG China meeting pawh hi hmun danga neih dan ngaihtuah mai turin an ti a ni," a ti.

UK sorkar hian kumin kumtir lam khan Xinjiang, China-ah mihring dikna chanvo nasa taka palzut nia sawiin, Chinese official ṭhenkhat hrekna a siam a, hemi chhan letna atan hian March thla khan China sorkar chuan UK MP panga-te chu an rama zin a khap bakah, an thil neihte khawih chet theih lohin a hreksak zui a ni. Hetianga ram pahnihte inkar boruak a ṭhat loh chhoh lai hian China parliamentary group chuan Common terrace-a summer party an neih turah Zheng hi thusawi turin an sawm a ni. Parliament-a hun hman tura Zheng sawm a nih chungchang hi Conservatice MP panga, China-in a hrek mekte chuan Speaker hnenah thlenin, an lungawi loh thu pawh an sawi.

Lord Speaker hnena lehkha an thawnah, China-in UK MP ṭhenkhat laka hrekna a siam hi member chauh ni lo, Parliament pum a beihna ang a nih thu sawiin, an hnathawhna hmun chu chutianga hrekna siamtuten aw an chhuahna hmun atana hman an phalsak tur a ni lo, tiin an sawi a ni.