WHO-in Africa vaccine mamawh zat 30% pek tum

World Health Organization (WHO) leh a thawhpuite chuan nakkum February-ah Africa khawmualpuiin Covid-19 vaccine a mamawh zat aṭanga 30% vel pek hman a tum tih a sawi.

Khawvel huapah coronavirus vaccine dose tluklehdingawn 5.7 an semchhuah tawh aṭanga 2% chiah hi Africa ramin an la dawng a ni.

WHO Director-General Tedros Adhanom Ghebreyesus chuan vaccine pek chhuah kawnga ram rethei leh hausa inkara inthlauhna zau lutuk siamṭha turin a ngen a, pharmaceutical company-te chu UN nena thawkdun COVAX tana inhawng zawka ke rawn pen turin a sawm. COVAX kaltlang hian ram rethei zawkte hnenah a thlawnin vaccine an semchhuak ṭhin a ni.

African Union chuan Covid-19 vaccine siamchhuaktute chu Africa ngaihsak loah leh awlsam taka lei tur pechhuak loah puhin, vaccine siamchhuaktu liante -a bikin India ram amite chu vaccine semchhuah kawnga khuahkhirhnate thlahdul deuh turin a ngen.

"Vaccine siamchhuaktute hian kan duhkhawp min pe lo a ni. Hei ai hian kan tiṭha thei a ni," tiin AU Special Envoy for COVID-19 Strive Masiyiwa chuan Geneva-a WHO briefing-ah a sawi.

Mahse vaccine siamchhuaktu company - Pfizer-BioNTech leh Moderna chuan an tihdan thlak an tum lo a, ram hausa zawkte hnenah booster shot pekchhuah tumin hma an la mek a ni.

Masiyiwa chuan kumin chhungin Africa khawmuala cheng mipui zinga 60% tal vaccine pek hman a pawimawh hle tih a sawi. African Union leh an thawhpuite chuan vaccine an mamawh zat aṭanga a zahve hi an lei dawn a, a zahve dang chu COVAX programme kaltlangin thilpek anga an dawn beisei a ni.

Nimin thleng khan Africa mipui zinga vaccine dose kima la hi 4% pawh an la tling pha lo. Khawvela vaccine semchhuah zinga a tam zawk ram hausa zual 10-te hnenah pek an la ni a, ram rethei zawkte'n vaccine hi an la dawng mumal lo hle.

COVAX hian kumin chhunga vaccine dose vaibelchhe hnih semchhuah an tumna chu 30% velin a phak loh rin a ni. GAVI leh WHO-te chuan vaccine indaih loh chhanah Serum Institute of India (SII)-in ramdang hnena thawnchhuak tura khuahkhirhna khauh tak an siam vang a nih thu a sawi.