NKorea-in ballistic missile enchhin leh

North Korea chuan Thawhlehni khan ballistic missile pahnih a kapchhuak leh niin South Korea Joint Chiefs of Staff ( (JCS) chuan a sawi.

Hei hi tunkar chhunga NKorea-in ralthuam a enchhin ṭum hnihna a ni a, Thawhṭanni khan long-range cruise missile, Japan kap pha tur nia sawi chu a lo enchhin tawh bawk.

JCS chuan NKorea hian a ram laili lai aṭangin ballistic missile hi khawchhak lama an ram tuipuiah a kap tih sawiin, South Korea leh US intelligence agency-te chuan an zirchiang mek tih a sawi bawk. Missile-te hi km 60-a sangah, kam 800-a thui an thlawk niin a sawi bawk.

Hetih lai hian North Korea ram ṭhianṭha, China foreign minister Wang Yi chu South Korea ramah a cham mek a, NKorea missile kahchhuah thu hriat a nih hmaa chanchinbu mite a kawmaah Korean Peninsula-ah boruak ṭha leh muanawm a awm theihna turin ram hrang hrangte pawhin hma an lak a duh thu a sawi a ni. Korean Peninsula-ah hian North Korea ram chauh ni lo, ram dangte pawhin an sipaite an chettlat tir fo a ni, a ti.

SKorea-in sub­marine-launched ballistic missile kap chhuak
South Korea chuan nimin vek khan submarine-launched ballistic missile (SLBM) hlawhtling taka an enchhin thu a sawi ve bawk. Nuclear ralthuam nei lo ram zingah SLBM kapchhuak thei hmasa ber a ni.

President Moon Jae-in chuan nimina SLBM enchhin hi a enpui tih a office chuan a tarlang. President office chuan hemi chungchangah hian thuchhuah siamin, SLBM neih chu an ram tana thil pawimawh tak a ni tih sawiin, Korean Peninsula-ah invenna tur leh boruak muanawm a awmna tura thil ṭangkai tak tur a ni, a ti. An sipaite chuan missile dang pawh an siam mek a, heng zingah hian supersonic missile pawh reiloteah an peihfel thei dawn niin a sawi bawk.