Kum 2050-ah climate change vangin Mi mtd 216-in an chenna hmun an chan thut thei - World Bank

World Bank chuan Thawhṭanni khan kum 2050-ah chuan climate change vangin mi maktaduai 210 vel zet chuan an chenna hmun an chhuahsan a ngai mai thei tih sawiin, hmalak vat a ṭul thu an sawi.

International financial institution chuan Thawhṭanni khan Groundswell report an tihchhuahah hemi chungchang hi an tarlang a, ram hrang hrang hruaitute chu global emmision tihniam tur leh climate change thlen thei thil muangchanga titawp zel turin an ngen a, tui vang, thlai thar chhuah tlem tial tial leh sea level sang zelte titawp tura hmalak a ṭul thu an report-ah chuan an tarlang a ni.

World Bank-a Sustainable Development vice president chuan thuchhuah an siamah,"Heng thil zawng zawng hi inzawmna nei vek an ni a, chuvang chuan ram hrang hrang kan ṭanpuina kawngah pawh sik leh sa danglam tur venhim paha hmasawnna thlen chu a kalkawp tir kan tum a, hmasawnna him zawk leh hun lo awm lehzel tur pawha hlauhawm lo tur zawngin ram hrang hrangte pawh kan thlawp dawn a ni," a ti.

World Bank Groundswell report chuan kum 2030 vel aṭang hi chuan climate change tuar nasa ramte chu hmun him lamah an insawn chhuak ṭan tawh an rin thu tarlan a ni a, kum 2050-ah phei chuan mi mtd 216 vel lai chuan an chenna hmun an chhuahsan tawh an ring.

Sub-Saharan Africa chu climate change nasa taka tuar hmasa tura rin an ni a, henglai hmun aṭang hian mi mtd 86 vel tal chu an insawn chhuah an ring hial.

An rin lawk dan chuan North Africa aṭang chuan mi mtd 19 vel an insawn chhuak mai thei a, chu chu mipui awm zawng zawnga 9% vel a ni phak.

Climate change hi nasa loin, emission tlemin sustainable development nasa taka kalpui pawh ni se, kum 2050-ah chuan a lo berah mi mtd 44 vel tal chuan an awmna hmun an chhuahsan a ngaih an ring tho.

Groundswell report an tihchhuah hi an vawi hnih tihchhuahna a ni tawh a, an tihchhuah hmasakah chuan Sub-Saharan Africa, South Asia, leh Latin America-te chu an thlurbing a, Thawhṭannia report an tihchhuahah hi chuan East Asia leh Pacific, North Africa, Eastern Europe leh Central Asia an thlurbing thung.