Pakistan-in Afghan raltlan lakluh belh inhuam tawh lo ; Kabul-a thlawhtheihna service turin Pakistan ngen

Pakistan national security adviser Moeed Yusuf chuan Nilaini khan an ramin Afghan raltlan lo lutte chu chhan hrang hrang vangin a pawm thei tawh dawn lo tih a sawi.

"Pakistan chu raltlan lo lutte dawngsawng thei dinhmunah kan ding tawh lo a ni," tiin Yusuf chuan Islamabad-a media mite hmaah a sawi. Pakistan hian kum tam tak liamta aṭang khan Afghanistan-a indona te leh tharum thawhna thleng fo ṭhin vangin Afghan raltlan maktaduai thum chuang a enkawl mek tih a sawi bawk.

Yusuf chuan Afghanistan mite ṭanpui turin theihtawp an chhuah zel dawn tih a sawi nghal a, hemi rual hian Afghan mite harsatna nasa zawk an tawh tur venpui tura theihthawp chhuah turin ram dangte a ngen nghal bawk a ni. Afghanistan ram an lo thlauhthlak vanga an lo tihsual tawh ang kha tinawn tawh lo turin a ngen.

Pakistan hruaitu chuan Afghanistan-in harsatna a tawh mek chu Islamic State group leh helpawl dangte, Pakistani Taliban-te pawh huamin remchangah lo hmang lo turin a ngen bawk.

Yusuf chuan khawvel ramdangte chu remna leh muanna a awm theihnan Taliban-te chu inbiakna awmze nei neihpui turin a ngen.

Hetih lai hian Afghanistan -a Taliban sorkar-a civil aviation ministry chuan Pakistan hnenah ram pahnihte inkara commercial flight operation chhunzawm leh turin a ngen. Ministry of Aviation and Transport of Afghanistan-in Pakistan Civil Aviation Authority (CAA) hnena lehkha an thawnah, Ariana Afghan Airlines leh Kam Airte-te chu ram pahnih inkara service chhunzawm phalsak turin a ngen a ni.

CAA hnena lehkha an thawnah, Afghanistan ministry chuan America sipai an chhuah khan Kabul Aiport chu an tichhia tih an sawi a, mahse Qatar-in a puihna avangin siam ṭhat leh an ni a, Airport pawh hman chhunzawm theih a ni leh tawh tih an sawi. Hetih lai hian Kabul airport hi flight hrang hrang dawngsawng tur peihfel a la ni lo nia sawi a ni a,mahse thlawhtheihna thlawk tur tawk chu an awm tho a, Thawhṭanni pawh khan Pakistan International Airlines (PIA) thlawhtheihna chu Kabul-ah thlawh tir a ni.

Qatar foreign minister Sheikh Mohammed bin Abdulrahman Al-Thani chuan Kabul airport-a enkawlna kawnga harsatna awm hrang hrangte chu Taliban-te nena an sawifel vek hma chuan mawhphurhna an la dawn lo tih a sawi. "Engkim kan chinfel a ngai dawn, a nih loh chuan airport-a thil thlengahte mawhphurhna kan la thei lo a ni" tiin Al-Thani chuan a sawi.