Thla 2 chuang hnuah khawvela Covid-19 kai zat tlahniam : WHO

World Health Organization (WHO) chuan kar hmasa khan khawvel pum huapin coronavirus kai thar maktaduai 4 vel an awm tih sawiin, thla hnih chuang hnua kar khata hri kai an tlakhniam ber ṭum a ni. Hemi hma hian hun eng emaw chen chu khar khata Covid-19 kai thar maktaduai 4.4 vel an ni ṭhin a ni.

U.N. health agency chuan Thawhlehni khan weekly update report tichhuakin, kar liam ta chhung khan khawvel region hrang hrangah hri kai thar hi a kar hmasa zawk aiin an tlahniam vek a ni, a ti.

Khawvel puma hri kai hi 62,000 velin an tlahniam a, Southeast Asia-ah chuan hri kai tlakhniamna hi a sang ber a, Africa-ah hri vanga thihna thleng chu 7% in a pung thung. Hri kai hmuhchhuah tamna ramte chu U.S, Britain, India, Iran leh Turkey-te niin, hri inkaichhawn awl tak Delta variant chu ram 180-ah hmuhchhuah a ni tawh bawk.

WHO chuan naupang leh tleirawlte chu puitling nena khaikhinin Covid-19 hri kai an la tlem zawk tih a sawi a, khawvel puma Covid-19 vanga thi zat zingah kum 24 hnuailam chu 0.5% chauh an ni bawk.

WHO chuan vaccine indaih lohna sang tak a awm avangin naupangte chu Covid-19 vaccine lak tir hmanhmawh lo turin a ti.