Israel-in African pemlutte thawnchhuah tum titawp rih
Israel Prime Minister Benjamin Netanyahu chuan an rama dan loa Africa mi pem lutte khawthlang rama thawn tura UN refugee agency nena inremna an lo siam tawh chu a titawp rih.
UN refugee agency nena inremna an siam thu a puan hnu lawkah, PM Netanyahu chuan ruahmanna an siam chu kalpui ani rih dawn lo tih a sawi leh nghal. PM hian Tel Aviv chhim lama Africa mi pemlut awmte chu hmuh phawt a tum tih a sawi. He inremna siam hi ṭangrual sorkara tel party-te pawhin an sawisel a ni.
Israel hian an rama dan loa Africa mi pemlutte chu thawn kir a tum a, an kir duh lo a nih pawhin tihluihna hmangin mipate chu Africa ramah thawn kir a tum tih a sawi a ni. Mahse hemi hnu hian UN refugee agency nen inremna siamin, dan loa pem lut zing a zahve chu khawthlang ramah thawnchhuah a, a bak a zahve dang chu Israel an awm zui theihan turin 'temporary residence' pek an ni dawn a ni. Africa mite thawn a tumna ram zinga hian Germany, Italy leh Canada-te pawh an tel.
Thawhṭanni zan khan Netanyahu chuan inremna an siam hi kalpui a ni rih dawn lo tih sawiin, ruahmanna an siam hmasak chu Rwanda a inhnuhdawh leh avangin an titlang thei lo niin a tarlang. PM chuan Israel mite ngaihdan hrang hrang a ngaihthlak hnuah UN deal chu a ngaihtuah ṭha leh dawn tih a sawi.
Jewish Home Party hotu Naftali Bennett chuan he ruahmanna siam hian an ram sorkar an rintawkna a tiderthawng niin a sawi. Justice Minister Ayelet Sahked pawhin inremna siam hi puanchhuah a ni hmain engmah a hre lo tih a sawi a, Culture Minister Miri Regev chuan pemlutte awm chhunzawm zel phalsak an nih chuan Israel nihna leh khawtlang nun thlengin a nghawng thei dawn niin a sawi bawk.
Israel-ah hian Africa ram aṭanga pem lut mi 42,000 vel an awm a, heng zinga a tam zawk chu Eritrea aṭanga lut an ni. Africa ram aṭanga pem lutte hian an ram tualchhung indona hlaua tlanchhia an nih thu leh, an rama kir leh chu an tan a him loh thu an sawi. Mahse Israel chuan Africa mi lut zinga tam zawk hi ei leh bar kawnga dinhmun ṭha zawk beiseia lut niin a sawi thung.