Britain-ah Malala-i a kir

Ni li chama Pakistan tlawhtu, Malala Yousafzai chu Thawhṭanni khan Britain-ah a kir leh ta.

Malala Yousafzai-i hi hmeichhe naupangte lehkha zirtir a pawimawh leh a ṭul thu a sawi ṭhin avangin kum 2012-a Pakistan Taliban firfiakten a luah silaiin an kap a, a hliam enkawl tur hian Britain-ah hruaiin a awm zui a ni. Britain-a hruai a nih hnuah a ṭum khatna atan kar kalta Ningani khan an ramah hian a kir leh a, a chhungten an zui a ni.

Pakistan-a a cham chhung hian a hmaa an lo chenna ṭhin leh beih a tawhna, Swat Valley pawh a tlawh a ni. Malala-i hian Oxford University-ah lehkha a zir mek a, a zirna a hi zawh hunah Pakistan ramah kir leh a tum nia sawi a ni. Khawvel ram hrang hrang, a bikin Pakistan, Nigeria, Jordan, Syria leh Kenya-a zirna chawisanna tura Malala Foundation kaltlanga a hmalakna avangin kum 2014 khan khawvel chawimawina sang, Nobel Peace Prize chu hlan a lo ni tawh a ni.