Trump-an Mexico ramri-ah sipai tir dawn

US President Donald Trump chuan an ram chhim lam, Mexico ramri-ah venhim hna thawk tura sipai tirh a tum.

Donald Trump-a hmaa US president pahnihte pawhin ramri venna kawnga pui turin National Guard-te an lo tir tawh a ni. Barack Obama khan ramri vengtu, Border Patrol-te pui turin National Guard 1,200 a tir a, George W Bush khan sipai 6,000 a lo tir tawh bawk a ni.

Thawhlehni-a Baltic ram hruaitute nena an inkawmnaah, President Trump chuan Mexico aṭanga ramri kana dan loa US-a lut pung zel dang tura Mexico-in hma a lak loh chuan North American Free Trade Agreement (Nafta) thlengin a nghawng dawn niin a sawi.

President Trump chuan Honduras aṭangin Mexico ramri kaltlanga US-a luh tumin a rualin mi tam tak an kal mek tih a sawi a, heng mite hi US an thlen hmain lo dan an ngai a ni, a ti. Trump hian tun hnaiah a twitter-ah an rama dan loa pem lut chungchangte a sawilang fo a, Democrats-te chu ramri hawng a, US-a pawikhawihna leh ruihhlo tawlhruk phalsakah a puh bawk. Ramri hungna bang leh venhimna ṭha tak dah a nih hma chuan ramri venpui tur hian sipai dah a ni dawn tih a sawi a ni

Fox News-in Honduras aṭangin mi 1,100 vel chu Mexico aṭanga US-a pem luh tumin an kal mek nia a puan hnuah Trump hian a twitter-ah a sawilang zui ve nghal a ni. Heng mite hian Mexico chhim lama Oaxaca state-ah a rualin kawngpui leh rel kawngte zawhin US hi an pan mek a ni.

Trump hian president thlan dawna a campaign-naah pawh Mexico nena an inri chu banga hung a tum thu a sawi tawh a, ramri hungna bang siamna tura sum mamawh zat dollar tluklehdingawn 25-a sawi zinga dollar tluklehdingawn 1.6 pekna tur chu thla hmasa khan a lo ziakfel tawh bawk. Trump chuan Mexico ramri hungna bang ṭha tak siam chu dan loa an rama pemlut leh ruihhlo tawlh ruk ṭhin tihtawpna tur pawimawh tak pakhat niin a sawi.