California-a YouTube headquarters bei

US-a San Bruno, California-a YouTube headquarters chu Thawhlehni khan hmeichhe pakhatin beiin silai a hmetpuak a, mi pali a kaphliam a, amah a inkaphlum zui bawk.

Thuneitute chuan pawikhawihtu hi California chhim lama cheng, Nasim Aghdam a nih thu an sawi. Police-te chuan pawikhawihtu hian chaw chhun ei hun lai, chhun dar 12:48 velah dining area chu panin silai a pawng kah niin an sawi bawk. Silai a hmehpuah chhan hi hriatchian a ni lo a, mahse official-te chuan midang nena an intihbuaina vang nia an rin thu leh, firfiaka chetna lam kaihhnawih a nih an rin loh thu an sawi.

San Bruno police hotu Ed Barberini chuan hliam tuarte hi damdawi-in panpui nghal an nih thu sawiin an zinga pahnih chu an dinhmun a ṭha lo hle niin a sawi.