Korea ram pahnihten working-level talk nei

North Korea leh South Korea ramten tun thla tawp lama inter-Korean summit an neih tur chungchang ngaihtuahin nimin khan ram pahnihte hian ramri bul, South Korea lama Panmunjom khuaah working-level talk an nei.

Panmunjon-a inbiakna hi chawhma dar 10 aṭangin neih ṭan a ni a, South Korea palaite hi National Intelligence Service-a senior director Kim Sang-gyun-an a ho a, North Korea palaite hi State Affairs Commission official Kim Chang-son-an a ho a ni. Meeting hi Blue House official dang pali-in an telpui bawk.

South Korea President Moon Jae-in leh North Korea ram hotu lu ber Kim Jong-un te chuan April 27 hian Panmunjon-a Peacae House-ah meeting an nei dawn a ni. He meeting neih tum hi a hlawhtlin chuan Kim hi kum 1950-53 Korean War hnuah North Korea ram hotu zingah South Korea ram leilung rap hmasa ber a ni ang. Korean War hi tawp mah se, ram pahnihte hian an la inep zui reng a ni.