China-ah ualau taka Bible zawrh theih tawh loh

Khawvela lehkhabu hralh tam ber, Bible chu China ramah ualau leh zalen taka zawrhchhuah theih a ni tawh lo.

Media report chuan Kristian-te lehkhabu thianghlim, Bible hi China rama online book store leh e-commerce site hrang hrang aṭangin lak thlak a nih thu a tarlang.

China sorkar chuan a hranin Bible hralh khapna thupek hi a tichhuak lo a, mahse sumdawng lian JD.com, Amazon.cn, Dang Dang leh Taobao-ahte chuan Bible hi zawn hmuh tur a awm tawh lo niin Hong Kong-a South China Morning Post chuan a sawi.

Hetih lai hian Chian leh Vatican sorkar chu China dicoeses-a bishop ruat dan tur chungchangah an inbe mek nia sawi a ni. Kum 1949-a Communist Party of China (CPC) in thuneihna a chan khan an rama Catholic leh Protestant missionary-te chu hnawhchhuah an ni. Kum 1951 aṭang khan China sorkar hnuaia Chinese Catholic Patriotic Association in a pawmpui biak-inah chauh Kristiante chu inkhawmphalsak an ni.

Hun rei tak chu China sorkar chuan Bible hi 'internal distribution' atan chauha tihchhuah zingah a telh a, hemi awmzia chu Bible hi sorkar-in a pawmpui biak-in chauhin an hralh thei a ni. Mahse he dan hi khauh taka kenkawh a ni hran lo.

Beijing-a lehkhabu siamtu chuan Ministry of Culture official-in ramdang lehkhabu an hralh theih tawh loh tur thu a sawiin a tarlang.

Bishop Jianlin chuan Bible zawrh khap chuan Kristiante a nghawr dawt niin a sawi a, mahse Bible chu khap theih a ni lo a, mipuite chuan a lei dan kawng an hre leh zel dawn tho a ni, a ti.

China-ah hian official-a chhinchhiah dan chaun Kristian maktaduai 44 vel an awm a, mahse a ruka Kristian, 'underground' Kristiante nen an vai hian maktaduai 90 chuang an awm rin a ni. Kristian sakhua hi China ramah hian a darh chak hle a, a darh zel tur vennan hian China sorkar chuan ruahmanna hi a siam niin ngaih a ni.