Italy-a hnathawkten 'green pass' certificate an neih a ngai
Italy sorkar chuan an rama hnathawkte chu vaccine an la ngei tawh tih finfiahna Covid "green pass", Covid negative test report emaw hri an dampui tawh tih finfiahna emaw an neih a ngai ngei ngei tawh dawn tih a sawi.
Hnathawktu zinga green pass nei lote chu an hna aṭanga suspend an nih mai bakah ni nga chhungin an hlawh pawh tihtawp sak theih nghal an ni ang.
He khuahkhirhna dan hi October 15 aṭanga hman ṭan tura tih a ni a, hri vanga harsatna tawk lian tak ram hian an ram mipui tam thei ang ber hnenah vaccine pekchhuah a tum mek bawk.
Covid-19 Green pass certificate hi digital leh paper hmanga pekchhuah an ni dawn. He pass hi ram chhunga train station, cinema, restaurant, gym leh swimming pool hmang turte chuan neih a lo ngai sa tawh a ni. School-ah pawh pass hi neih a ngai tawh a, hei vang hian vaccine la lo zirtirtu ṭhenkhatte chu an hna thawh chhunzawm phalsak an ni rih lo.
Ningani khan Italy sorkar chuan he dan hi huam zau zawka kalpui turin,sector hrang hranga hnathawkte leh mahni eizawnna bil bik neite huam tur dan thar hi a siam leh a ni.
Sumdawnna hmun leh thawktu zinga green pass nei lo, hnathawk lui an awm chuan pawisa €1,500 (£1,280) thleng chawitir theih an ni bawk.
Health Minister Roberto Speranza chuan he dan thar hi mipuite himna tur leh vaccine semchhuah hna chak zawka kalpui theihna tur a nih thu a sawi.
Vaccine la duh lo pawl tlemte chuan sorkar ruahmanna siam hi an duh loh thu sawi mah se ram mipui tam zawk chuan sorkar vaccination campaign hi an thlawp hle thung. Italy mipui zinga 65% te chuan vaccine dose bikimin la tawh mah se hri inkaichhawn awlsam tak, Delta variant vangin hri kai thar hi an sang chak hle a ni.
Italy-ah hian Covid-19 kai maktaduai 4.6 chuang an awm tawh a, Covid kaihhnawih vanga thi 1,30,000 chuang an awm tawh tih Johns Hopkins University data chuan a tarlang.
Green pass hi European Union ramte inkalpawhna atana hman tel turin a hmain tih a lo ni tawh a, ram eng emaw zat chuan chhan hrang hrang vangin certificate hi an phut tawh a ni.