France sorkarin healthworker 3,000 a hrem

France sorkar chuan an rama healthworker 3,000-te chu sorkarin vaccine la vek tura dan a siam tawh an zawm loh avangin a suspend.

Sorkar chuan an rama healthcare worker, care home leh fire service-a thawkte chu an hna thawk chhunzawm tur chuan Covid-19 dose khatna tal la vek turin a ti a, September 15 thleng hun a pe a ni. Hun tiam chhung hian thawktu 3,000 vel chuan vaccine hi an la lak loh vangin suspend an ni ta a ni.

Health minister Olivier Veran chuan suspend hi rei tak awh tur a ni lo tih sawiin, sorkarin dan hi a takin a kalpui tih an hriat avangin vaccine la duh pawh an pun chhoh thu a sawi bawk.

Healthcare worker tam tak suspend an nih avang hian hmun ṭhenkhatah chuan thawktu indaihlohna avangin healthcare service pawh a buai phah a ni. Nice khuaa hospital pakhata thawk 40 vel chu suspend an nih avangin an buai hle a, Montelimar khuaa hospital pakhat pawhin thawktu indaih lohna avangin non-urgent operation chu an ṭhulh vek tih an sawi bawk.

France sorkar chuan July thla aṭang khan restaurant, bar, thlawhtheihna leh rel hmang turte chu vaccine an la tih fiahna, health pass a lo phut tawh a, hei vang hian vaccine la pawh an pun phah hle a ni. Puitling zingah vaccine dose khatna la tawh hi 90% dawn an tling tawh a, naupang kum 12 leh a chunglam pawh pek chhuah ṭan a ni tawh bawk a ni.