China-in mipui tld 1 hnenah Covid-19 vaccine bikimin pe tawh

China health official-te chuan Ningani khan an ram mipui tluklehdingawn khat chuang hnenah Covid-19 vaccine dose kimin an pe tawh tih sawiin, hei hi an rama cheng tluklehdingawn 1.4 aṭangin 72% vel an tling phak a ni.

Nilaini thleng khan vaccine dose tld 2.16 pek chhuah a ni tawh a, mi tld 1.01 chuan dose bikimin an la tawh tih National Health Commission thupuangtu Mi Feng chuan news conference-ah a sawi.

China-ah hian Delta variant a darh thar leh mek a, an ram chhim chhak lam, Fujian province-ah ni ruk liam ta chhung khan hri kai thar mi 200 an awm belh leh a ni.

Hri darh zel tur venna atan thuneitute chuan hri kai thar awmna leh a chhehvel bialah inkharkhipna a kalpui nghal a, school leh intihhlimna hmunte kharin,province aṭanga zinchhuah a khap bawk.

Covid-19 hri hmuhchhuah ṭanna, China-ah hian nikum lam khan hlawhtling takin hri darh tur hi an lo veng thei tawh a ni. Tun ṭuma hri darh thar leh pawh khuahkhirh theih ngei tumin ṭan an la nghal a, hri kai hmuh tharna bialahte inkharkhipna khauh tak siamin mass testing-te neih nghal zel a ni.

Ramchhunga lut thei turte pawh bithliahin, an ramchhunga lo lutte chu hotel-ah kar hnih tal in quarantine tura tih an ni bawk.