Donald Trump-an Mexico ramria National Guard dahna tur thupek tichhuak

US President Donald Trump chuan US-Mexico ramri-ah venhim hna thawhna kawnga pui turin National Guard a dah tur thu a lo sawi tawh a, Ningani khan sipaite dahna tur thupek hi a tichhuak.

Donald Trump chuan Mexico ramri aṭang hian an ram chhungah dan loin mi tam tak an lut ṭhin tih sawiin, dan loa ramri paltlang ṭhinte dang tur hian hma a la dawn tih a sawi tawh a ni. Tun hnaia Central America aṭangin US-a luh tum mi tam takin a rualin Mexico ramri lam an pan mek a, heng mite lo dan hi a ngaih thu pawh a sawi. President-in sipai tirhna thupek a tihchhuah tak avangin heng mite pawh hian US luh an tumna chu an titawp nia sawi a ni.

Trump chuan an ram chhim lam, Mexico nen an inri-na dinhmun chu a ṭha lo hle tih sawiin, dan mumal taka kenkawh a nih loh avangin hei hi America ram leh a mipuite himna atan pawh a hlauhthawnawm a ni tiin, ramri veng tura sipai tirh mai loh chu thlan tur dang an nei lo tih a sawi.

Homeland Security Secretary Kirstjen Nielsen-i chuan Trump hian ramri vengtu, Border Patrol-tepui tura National Guard tirh an nih dan tur chu buaipui a, ramri bul state governor-te thawhpui turin Pentagon leh Department of Home Security-te pawh a hrilh a ni, a ti.

Nielsen-i chuan chhim lama Mexico ramri kaltlang hian US ah ruihhlo tawlhluh, misual rual pawl pawikhawihna, dan lo pem lutte an tam hle tih a sawi a, mahse Trump-a a presidet hnuah ramri-a pawikhawihna thleng chu a tlahniam a, mahse dan loa US-a pem tuma lut erawh an pung chho leh niin a sawi.