France-in dawt sawiah Australia leh US a puh ; Ram pahniha France ambassador-te a ko haw

France sorkar chuan US, UK leh Australia ramten security lama thawhhonna tur, AUKUS an siam chungchangah a lungawi lo hle a, US leh Australia chu dawt sawiah a puh. Heng ram pahniha France palai awmte pawh a ko haw nghal bawk.

Ram pathumten thawhhona, AUKUS an siam hmang hian US leh UK chuan Australia sipaiten nuclear-powered submarine an neih theihna kawngah an pui dawn a ni.

Hetih lai hian he inremna an siam avang hian Australia chuan France submarine a leina tur contract chu a sut a, US vessel lei a tum ta zawk a ni. Hei hian France a ti lungawi lo hle. Australia nen hian kum 2016 khan contract, USD tluklehdingawn 40 hu an lo siam tawh a, he inremna an siam tawh Australia-in a sut hi hnung lama beihna ang hiala an ngaih thu an sawi.

China pawhin AUKUS siam chu a dem thu a sawi bawk a, hei hi Asia Pacific-a China lian zel dodal an tumna hmanrua niin a puh.

France president Emmanuel Macron chuan Australia leh US-a an ram ambassador-te koh hawna thupek hi a tichhuak a, he thawhhonaa tel UK-a an ram palai erawh a ko haw tel lo thung. France foreign minister Jean-Yves Le Drian chuan AUKUS-ah hian Britain chu a tel ve mai mai a nih avangin ambassador koh haw ve kher hi a ṭul lo tih a sawi a, nakkuma Madrid-a NATO summit neih turah pawh AUKUS chugnchang hi ngaihtuah a ṭul a ni, a ti.

Australia chuan France nena inlaichinna ṭha tak an neih avangin France palai koh haw a ni chu pawi a ni tih a sawi a, thil danga an thawhdunna chu an chhunzawm zel dawn tho tih a sawi. US State department thupuangtu, Ned Price pawhin France chu an ram thawhpui pawimawh tak a ni tiin, an inkara inhriatthiam lohna awm chu chinfel ngei an tum tih a sawi bawk.