Palestinian tang tlanchhuakte man kim tawh
Israel sipaite chuan kar hmasaa Israel jail aṭanga tlanchhuak Palestinian sipai paruk zinga an la man loh awmchhun pahnihte nimin khan an man ve leh.
Islamic Jihad pawl member pahnihte hi West Bank-a Jenin-ah nimin varṭian khan an man tih Israeli Police Commissioner Yaakov Shabtai chuan a sawi.
Israeli police thupuangtu chuan tang tlanchhuak an mante chu Ayham Nayef Kamamji leh Munadel Yacoub Infeiat-te an nih thu a sawi. Kum 35 mi Kamamji hi kum 2006 khan man a ni a, damchhung tang tura hrem niin, kum 26 mi Infeiat hi kum 2019 khan man a lo ni tawh tih Palestinian Prisoners Club chuan a tarlang.
Mi tang tlanchhuak dang palite chu Israel hmarlama Nazareth khaw bulah kar liam ta khan man an lo ni tawh bawk. An paruk hian Israel mite beihna leh beih tuma puhna thubuaia thiam loh chantir vek an ni.
Nimin zinga Jenin khuaa tang tlanchhuakte man tuma Israel sipaiten an dapnaah hian Palestinian mite nen an intibuai a ni. Mahse Israel sipaite hian an hual vek hnuah Kamamji leh Infeiat-te hi an inpe a, anmahni lo puitu Palestinian pahnih pawh man tel an nih thu Israel sipaite chuan an sawi. Khawchhung mite chuan Israel sipaite hi lung leh puak thei thil dang hmangin an lo bei a, sipaiten khawpui an chhuahsan rual hian silai pawh hmehpuah a ni bawk.
September 6-a Palestinian mi paruk tlanchhuakte hian prison cell-ah leiverhin an tlanchhuak a ni. Israeli official-te chuan mi paruk tlanchhuah theihna atana mawhphurtute an chhui chiang dawn tih an sawi.