Police kutah Brazil president hlui Lula a inpe

Brazil president hlui Luiz Inacio Lula da Silva chu kar kalta Inrinni khan police-te kutah a inpe ta.

Lula hi eiruk thubuaiah thiam loh chantirin kum 12 tang tura hrem a ni a, hei vang hian kumin October thlaa president thlanna neih tura chuh a tum pawh a thei dawn ta lo a ni. Lula chuan a thubuai hi ngaihtuah ṭha turin a ngen a, a ngenna thehluh ngaihtuah a nih chhung pawhin jail-a dah lut turin Supreme Court chuan a ti a ni.

Supreme Court chuan kar kalta Ningai khan Lula hi man turin a ti a, hemi hnu hian judge chuan Lula hi inpe tura hriattirin, a inpe duh lo a nih pawhin tihluihna hmanga man a ni dawn tih a sawi a ni. Inrinni khan Lula hi amah thlawptuten inpe lo tura ngena an dang chungin police kutah hian a inpe ta a ni.

Lula thlawptute chuan Inrinni khan police kuta Lula inpek hi remti loin an dang a, a motor an dansak avangin Lula hian Sao Paulo-a Metalworkers' Union headquarters aṭangin kea kalin, zan dar 6.45 khan police kutah hian a inpe a ni.

Inrinni chawhma lam khan Lula hian rally-a amah thlawptu mipui tam tak pungkhawm hmaah thu a sawi. Lula chuan an puhnaahte thiam lohna engmah a neih loh thu a sawi a, thuneitute kuta inpek chu duh lo mah se, a thawhpui leh adviser-te chuan dan palzut chu thil ṭha ber nia an hriat loh avangin police kuta a inpek tur thu hi a sawi a ni. Lula chuan a dikna chu hailan a la ni ngei dawn tih sawiin, thil dik lo titu dik tak chu a la lang chhuak dawn a ni, a ti.

Police kuta a inpek hnuah, helicopter hmangin a tanna tur, Curitiba-a federal police headquarters-ah hruai nghal a ni. A tanna cell hi meter 15 biala zau a ni.