Pakistan hmun tam zawkah Geo TV tihtawpsak

Pakistan-a news network Geo TV chuan an news channel chu Pakistan ramchhung hmun tam zawkah tihtawpsak an ni tih a sawi a, he thilah hian sipaite an inrawlh niin report tam tak chuan a tarlang bawk.

Geo TV chief executive Mir Ibrahim Rahman chuan an news channel chu an rama hmun 80% velah tihtawp sak a ni tih a sawi. March thla aṭang khan an television network hi enfiah sak ṭan a ni tawh a, sipaite awmna hmunah chuan Geo News hi tihchhuah a ni tawh lo. April thla khan an sports leh entertainment channel pawh hmun tam takah tihtawpsak a ni bawk.

Rahman chuan Pakistan Army-te rorelna hmunah an channel-te chu tihtawp an ni zel tih a sawi a, mahse he thil hi sipaite tih a nih leh nih loh erawh a sawi lang lo. Geo News parent group, Jang Group chuan hemi chungchangah hian thuchhuah siamin, Geo network chuan mipuite tan thu diktak tarlang ṭhinin, Pakistan ram danpui kalh zawngin thil a ti ngai lo niin a sawi. Pakistan ram danpui chuan ram mipute tana information pe turin dikna a pe a ni, a ti. Geo News en thei lote chu complaint thehlut turin a ngen bawk.