Trump-a’n Syria chhan let a tiam
US President Donald Trump chuan Syria sipaiten kar kalta Inrinni-a Damascus khaw dai, Douna beihna atan tur hlauhawm, chemical ralthuam an hmang nia sawi chungchangah, Syria thiltih dan chu na taka chhan let a tiam.
Kar kalta Inrinni-a Syria sipaiten hel kuta awm, Douna khua an beihnaah chlorine gas an hmang nia sawi a ni a, thi zat hi hriatchian an la ni lo. He thil thleng hi ram leh pawl hrang hrangte chuan an dem thu an sawi a ni.
Donald Trump chuan Thawhṭan zan khan France President Emmanuel Macron chu biain, Douna khuaa thil thleng leh, thil dik lo titute na taka chhan let an duh thu an sawi a ni. UK Prime Minister Theres May-i pawhin chemical ralthuam hman a ni chu a dem thu sawiin, hetianga rawng taka thiltihna thlengah Syria President Bashar al-Assad-a thlawptute chu mawphurtuah a puh a ni.
Syria sipaiten chemical ralthuam an hmang nia sawi a nih vang hian UN Security Council meeting pawh neih a ni a, he meeting-ah hian US leh Syria thlawptu, Russia pawh ṭawngkamin an intawng na hle.
Russia palai Vassily Nebenzia chuan chemical ralthuam hman nia sawi chu helhoin an phuahchawp mai niin a sawi a, US-in sipai hmanga a chhang let a nih chuan nghawng pawi tak a nei dawn niin a vau zui. Hetihlai hian US palai Nikki Haley chuan Syria sipaite chetdan thlawptu, Russia kutah pawh Syria naupang pawisawi lote thisen a kai a ni tih sawiin, Syria President Assad chu ramhuai tiin a sawi a ni. Haley-i chuan Syria-in chemical ralthuam a siam chungchang enfiahtu tur din thar turin a phut bawk a, mahse he rawtna hi Russia chuan a pawmpui lo tih a sawi.
Syrian-American Medical Society chuan Douma-a medical centre-ah mi 500 chuang damlo enkawl ngai hruai an nih thu a sawi a, heng mite nat dan hi chemical agent vanga natna lanchhuah dan vek an nih thu a sawi. Thawk lama harsatna neiin, an vun te duk a, a chilphuante tlain, an taksa te a kan bakah chlorine gas rim ang chi te pawh a chhuak niin a tarlang. Douma hi midang tlawhpawh theih loha khar anih avangin thi zat leh hliam zat dik tak hi pawn lam miten an hrechiang thei lo a ni.