Musharraf-an an rama kir hun tur sawn hla

Pakistan President hlui Pervez Musharraf-a chuan Pakistan sorkar chuan security a dil ang a pe thei dawn lo nia sawiin an rama a kir hun tur a sawn hla. Sorkar thar a din hma chuan kir a tum lo tih a sawi bawk.

President hlui leh All Pakistan Muslim League (APML) hotu, Musharraf-a hi ram phatsantua puh a nih chungchanga special court-a inlan tur a ni. Mahse an rama a kir hunah venhimna a duh ang chu sorkarin a pek theih dawn loh avangin UAE aṭanga haw a tum chu a ṭhulh leh ta niin party hruaitu chuan a sawi. Kumin May emaw, June emaw-a sorkar lailawk a din hunah a kir dawn chauh niin a sawi bawk.

Kum 74 mi Musharraf-a hi nikum-a Pakistan sorkarin damdawi in lama inenkawl tura Pakistan chhuahsan a phalsak hnuah Dubai-ah a kal a, tun thlengin a la awm zui a ni. Musharraf-a hian Pakistan-a a kir huna vehimna ṭha tak pe turin sorkar hnenah ngenna a lo thlen tawh a ni.

Kum 1999 aṭang 2008 thlenga Pakistan President nihna chelhtu, Musharraf-a hi thuneihna a chan laia emergency puanga judge 100 chuang a ban vang leh, superior court judge-te pawnchhuak thei loa an ina a hren avangin kum 2014, March khan ram phatsantua puhin thubuai siamsak a ni.