Taliban-ten Women Ministry sign an thlak

Aghanistan-a roreltu, Taliban chuan Kabul-a Ministry of Women Affairs building luhna bula an sign chu Ministry for the Propagation of Virtue and the Prevention of Vice tiin a thlak a, Koran verse a dah tel.

Taliban sorkar tharin a hmaa ministry a puan zingah Ministry of Women Affairs hi a telh lo a ni. Hmeichhiate chu lehkha zir chhunzawm leh hnathawh phalsak an ni dawn tih lo sawi tawh mah se, cabinet official-te chuan mipate nen hna an thawh ho theih loh tur thu an sawi.

Women Ministry-a hnathawkte pawh building-ah hian luh phalsak an ni lo. Sorkar hmasaah khan he ministry hnuaia thawk zinga 90% chu hmeichhia an ni. Taliban thupuangtu Zabiullah Mujahid chuan Sharia law hnuaiah hmeichhiate puala hnathawktu tur rintlak tak siam a nih tur thu a sawi a, sorkar hmasa women ministry hian Afghanistan-a hmeichhiate dinhmun chawikanna turin engmah a thawk lo a ni, a ti. Women ministry a awm chung hian thingtlang lam biala hmeichiate chu an dikna chanvo pawh pek an ni lo tiin a sawi a ni.

Kabul Mayor Hamdullah Namony chuan hmeichhia hnathawkte chu thupek dang a awm hma chu in lama awm rih turin a ti. Hnathawhna hmunah mipate khawih theih loh, hmeichhiaten an buaipui ngai chi a awm tih sawiin, heng mite chauh hi ngaihnathiam an ni rih dawn a ni, a ti. Hemi hma hian high school leh higher zirlai hmeichhiate pawh school kal phalsak an ni rih lo tih Taliban sorkar chuan a lo sawi tawh bawk.

Pathianni khan Kabul-ah hmeichhe ṭhenkhat chuan hnathawh leh lehkha zir phalsak tura Taliban sorkar phutin Women Ministry office kawtah an pungkhawm. Lehkha ziakte kengin, khawtlanga hmeichhiate tel ve phal lohna chu society thi a ni tih thute an ziak a, hmeichhia dikna chanvo pe te tura a phutna thute an aurual pui bawk.

Hmeichhe zirlaite thlawpna lantir
Taliban sorkarin high school leh higher zirlai hmeichhiate school kal a khapsak avangin, zirlai mipa ṭhenkhat chuan hmeichhiate thlawpna lantirin school an kal duh lo.

Kar liam ta Zirtawpni khan Taliban education ministry chuan boys' secondary school-te chu hawng tawh turin thupek a tichhuak a, hmeichhe school-te erawh hawn hun tur an la puang tello. Sorkar thuchhuah chuan, zirlai mipa leh zirtirtu mipate chu an zirna hmunah kal chhunzawm tawh turin a ti a ni.

Mipate tana zirna kal chhunzawm ṭan ni mah se, zirlai mipa eng emaw zat chuan school an la kal duh lo a, hmeichhiate tana school hawnsak a nih ve hma chuan an kal dawn bik lo tih an sawi. Taliban thupuangtu Mujahid chuan hmeichhiate tana school kal theih dan tur hi an ruahman mek tih a sawi a, mahse engtikah nge kal phalsak an nih dawn erawh a sawilang lo.