US-in Texas border camp aṭangin Haiti mite thawn kir

US chuan Mexico nena an inrina bul, Texas state huam chhunga border camp-a awm, Haiti mite chu Pathianni aṭang khan a thawnkir ṭan.

Tun hnaia Haiti mi 15,000 chuang chuan Mexico ramri kaltlangin US hi an lut a, Texas-ah ni eng emaw zat tangkang tawhin, camp lailawk an siam a ni. Pathianni khan US chuan he border camp-a tangkhang mekte hi thlawhtheihna hmangin Haiti khawpui, Port-au-Prince lamah a thawn kir leh a ni.

Hetih lai hian US-a pem luh tumte hi Haiti rama thawn kir leh an nih avangin an lungawi lo hle a, an nunna atan pawh a hlauhthawnawm niin an sawi. Haiti-ah chuan hnathawh tur a awm loh bakah, a him lo zawk bawk niin an sawi.

Pathianni khan Texas camp-a awmte hi thlawhtheihna pathum hmangin phurh haw an ni a, thlawhtheihna pakhatah hian mi 145 zel a phur a ni. He camp-a awm mek mi 3,300 te chu detention centre-ah sawn an ni tih Border patrol chief Raul L Ortiz chuan a sawi bawk. Ni ruk/sarih chhungin mi dang 12,662-te pawh thawn kir leh hman an tum tih a sawi.

Texas border camp-ah hian Haiti mite bakah Cuba, Pevuria, Venezueala leh Nicaragua aṭanga kalte pawh an tel.

Office of National Migra-tion-a an hotu, Marie-Lourde Jean-Charles chuan Haiti rama an thawn kirte hi USD 100 ṭheuh pek an nih bakah Covid-19 test neihsak vek an ni tih a sawi.