Kangmei, tuilian, khawkheng vangin khawvel boruak chhe chak hle : UN

Kan chenna leilung chu pre-industrial hunlai ai khan 2.7 degree Celcius-in a lum belh mek tih UN Framework Convention on Climate Change-in khawvela boruak chhia, global emission report a tihchhuahah an tarlang.

Scientist-te chhut danin, ram hrang hrangten boruak chhia an tihchhuah chu kum 2030 ral hmaa 45% tala an tihhniam loh chuan khawvelin dinhmun chhe zawk a hmachhawn dawn niin an sawi. Mahse tuna boruak awm dan en chuan kum 2010 ai khan kum 2030-ah chuan 16% in a sang dawn tih report chuan a tarlang.

UN Secretary-General António Guterres chuan kan khawvel kal dan chuan chhiatlam a pan mek tih sawiin, "Kum ruk liamtaa Paris Agreement-a 1.5 degree celcius-a tihniam tura goal kan siam chu bawhchhiat a ni mek. Kan tum kan tihlawhtling zo lo anih chuan nunna leh khawsaknain a tuar dawn a ni," a ti.

Ram hrang hrangte chu khawvel chhe mek tungding tura ṭangrual turin a sawm a, boruak chhe mek nena kan inumnaah hian chak zawk nih tum turin a ngen a."Mitinin kan mawhphurhna kan hlen ṭheuh a ngai a ni," tiin a sawi.

Guterrres chuan "@UNFCCC report tarlan danin khawvel lum zel 1.5°C-a tihniam tura #ParisAgreement intiamna kan bawhchhe mek a ni. Kan tum kan la thleng thei a, mahse hun kan ngah tawh lo hle a ni. Climate crisis laka hnehna kan chan theihnan tum mumal leh thawh hona kan mamawh a ni," tiin twitter kaltlangin a sawi.

Khawvela boruak inthlak danglam chak tak karah he report hi siam a ni a, hetihlai hian US khawthlang lamte chu ram kang, khawkheng leh tuilianten a tibuai mek a, China pawh July thla khan thlipui leh tuilian rapthlak tak a tuar bawk. Europe chhimlama ram tam takte chuan ram kang leh tuilian nasa tak an tawk fo bawk a ni.