California-a ram kang acre 40,000 chuangah darh tawh

United States-a California state-a ramkang pahnih- Windy leh KNP Complex fire te chu Sequoia National Forest leh Sequoia National Park-bul velah chhuakin, ram acre 18,075 (73.1 square km) leh acre 21,777 (88.1 square km) chuangah kangmei hi a darh tawh a ni.

Sequoia National Park-in kar hmasa Inrinnia thuchhuah an siamah, KNP Complex chuan Giant Forest-a Four Guardsmen a thleng tawh tih an sawi. Giant Forest-ah hian thing lian chi, giant sequoias 2,000 chuang a awm a, khawvela thing lian ber (the world`s largest tree by volume) General Sherman Tree pawh a awm a ni.

Four Guardsmen hi Sequoias Forest chhim lam gate bula, sequoias kung lian pali awmna lai a ni.

Thuchhuah an siamah, "Kang ṭhelh-tuten theihtawpa an beihna te, sequoia thing bulṭhuta structure wrap an vuah avangin ram rohlu te hi kan chhanhim thei ta a ni, "a ti.

California-a sequoia thing awmna hmuna kangmei chhuak vang hian Pathianni khan mi eng emaw zat chu hmun him lamah sawnchhuah leh an ni a, thuneitute chuan ramkang hi a la mit mai dawn lo tih an sawi.

Sierra Nevada tlanga sequoia thingkung, kum sang chuanga upa te chu khawkheng, boruak inthlak leh kangmei nasa tak chhuak ṭhin vangin an dinhmun a him tawk tawh lo hle nia sawi a ni. Heng thingkhung hi feet 100 chuang daiha sangte an ni. Nikum khan ram kang, Castle Fire avangin he hmuna sequoias kung awm aṭanga 10% vel chu a lo kangral tawh niin National Park Service chuan a tarlang.

Khawvela thingkung lian ber ral thei dinhmunah ding