Boxer Manny Pacquiao-a'n 2022 Philippines President inthlan chuh dawn

Boxing vanga khawvel mipuite hmelhriat leh hmingthang tak Manny Pacquiao chuan Pathianni khan nakkum 2022-a an ram, Philippines President inthlanah a chuh ve dawn tih a sawi.

Pacquiao chuan an ram sorkara eirukna do tur leh President ni lai Rodrigo Duterte-an China nena inṭhian ṭhatna a siamte chu a ngaimawh thu a sawi.

Politics lama an khingpuiten Duterte nena hun rei tak lo thawk dun tawh Senator Christopher "Bong" Go chu presidential candidate atana an puan hnuah Pacquiao pawh hian PDP-Laban Party aiawha ding tura an sawmna hi a pawm thu a sawi ve leh a ni.

An khingpuite hian Duterte chu vice president atan an ruat leh a, mahse hei hi verther taka Duterte-an thuneihna chan a tum lehna niin mi tam tak chuan an ngai. Duterte hi President term hnihna a hman zawh dawn avangin President hi a chuh zawm thei tawh lo a ni.

Kum 42 mi Pacquioa chuan, "Fighter ka ni a, boxing ring chhung leh pawn lamah pawh fighter ka ni zel ang. Republic of the Philippines President chuh tura min ruatna hi ka pawm e," tiin assembly-ah a sawi.

Khawvela boxer ropui berte zinga mi leh division pariata world title kawl thei awmchhun Pacquiao chuan professional career kum 26 chhung a hun alo hman tawhna chungchang an zawhna chu a chhang lo thung. Boxing lamah an ram mipuite hriat hlawhin lar viau mah se, President thlan tur chungchangah mipui ngaihdan lakah erawh Duterte fanu Sara Duterte-Carpio lakah ala hniam zawk a ni.

Pacquiao hian an ram President Duterte chu China chungchanga a ngaihdan leh eiruk dona kawnga a hmalak danah duhkhawp loin a sawisel fo a ni. Kumin July thla khan PDP-Laban hruaitu a nihna aṭangin paihthlak a ni a, mahse hei hi lamṭang pawl erawh chuan an pawm lo thung.

Duterte nena inpawh tak ṭhin Pacquiao chuan hripui leng vanga chhungkaw harsate tana an ruahman pesos tluklehdingawn 10 (USD maktaduai 200) chu chin hriat lohin a awm zui a, hei hi an rama eirukna thlengte hailan a nih theihna tura a chhuina pakhatah a hmuchhuak tih a sawi. Senate-in an rama hri leng do hna kalpuina hnuaiah damdawi leh damdawi hmanruate to uchuak taka lei a nih chungchang a chhui mek karah, Pacquiao hian eiruk do beihpui a kalpui ve mek bawk.

Hetih lai hian President Duterte chuan eiruk do hna a thawh chu politics khelhna hmanrua atan chauha hman a ni loh zia lantirna atan, sorkar official eirute hming chu puang turin a cho let ve bawk a ni. Hei hi Paquiao chuan chhanglet ve nghalin sorkar official-te eirute chu taninah khung an ni ngei dawn tia vauin an hun a liam tawh tih a sawi a ni.